Koronavırýs: Aqtóbe oblysynyń Mártók aýdanynda karantın jeńildetildi
AQTÓBE. QazAqparat – Aqtóbe oblysynyń Mártók aýdanynda koronavırýsqa qatysty karantın talaptaryn jeńildetý boıynsha jańa qaýly shyqty, dep habarlaıdy QazAqparat tilshisi.
Mártók aýdanynda balalardyń túzeý kabınetteri men bilim berý ortalyqtarynyń jumysy qaıta jandandy. Tek adam sany 15-ten aspaýy tıis. Sonymen birge medıtsınalyq ortalyqtar men kabınetterge, stomatologııaǵa aldyn ala jazylý kerek. Ekinshi deńgeıli bank bólimsheleri, Halyqqa qyzmet kórsetý ortalyǵy men poshta saǵat 09:00-den 18:00-ge deıin qyzmet kórsetedi.
«Mektepke deıingi mekemelerdiń kezekshi toptaryna qabyldanǵan bala sany 15-ten aspaýy tıis. Dinı obektilerde ujymdyq is-sharalar ótkizýge bolmaıdy. Al qoǵamdyq tamaqtaný ortalyqtary saǵat 07:00-den 24:00-ge deıin jumys isteıdi. Onda tek 50 adamǵa qyzmet kórsetýge ruqsat. Al azyq-túlik jáne azyq-túlik emes bazarlar, saýda úıleri jumys kúnderi ishki tártip boıynsha jumys isteıdi. Tek demalys kúnderi qyzmetin toqtatady», - dep jazylǵan Aqtóbe oblysynyń bas sanıtarııalyq-epıdemıologııalyq baqylaý departamentiniń basshysy Nursulý Berkimbaevanyń Qaýlysynda.
Sonymen birge mádenıet nysandary da jumys isteıdi. Tek adam sany 30-dan aspaýy qajet. Basseın qyzmeti de ishki tártippen retteledi. Sport nysandarynda jattyǵýǵa ruqsat berildi.
