Koronavırýs: AQSh-ta 100 mln adam ekpe aldy, Frantsııada qatań lokdaýn bastaldy
Germanııa prezıdenti Frank-Valter Shtaınmaıer el turǵyndaryn aldaǵy birneshe apta boıy qatań shekteý sharalaryna daıyn bolýǵa shaqyrdy.
Bul týraly ol 2 sáýir kúni Pasha merekesine baılanysty joldaýynda málimdedi. Sonymen qatar, halyqty vaktsınatsııa naýqanyna belsene qatysýǵa shaqyrdy.
AQSh halqynyń úshten biri - 100 mıllıonnan astam adam, indetke qarsy ekpeniń kem degende alǵashqy dozasyn qabyldaǵan.
Shamamen 58 mıllıon adam ekpeniń eki dozasymen egilgen. AQSh-ta kún saıyn shamamen 3 mıllıon adamǵa vırýsqa qarsy ınektsııa jasalady.
Brazılııada bir táýlik ishinde covid-19-dan 2 922 adam qaıtys bolǵan. Elde indetti juqtyrǵandardyń jalpy sany 70 238 adamǵa artqan.
Epıdemııa bastalǵannan beri elde SARS-CoV-2 vırýsyn juqtyrǵandardyń sany 13 mıllıonǵa jýyqtaǵan jáne 325 myńnan astam adam qaıtys bolǵan.
Frantsııada 3 sáýirden bastap bir aı merzimge jalpyulttyq lokdaýn engizilmek.
Barlyq 96 departamentte saǵat 19.00-den bastap komendanttyq saǵat engiziledi jáne turǵylyqty jerinen 10 shaqyrymnan astam qashyqtyqqa shyǵýǵa tyıym salynady.
Jumys isteıtin turǵyndaryna qashyqtan jumys jasaý rejimine aýysý usynyldy.
5 sáýirden bastap mektepter men balabaqshalar kem degende úsh aptaǵa jabylady. Stýdentter aptasyna bir ret dáriske qatysa alady.
Belgııada polıtsııa epıdemııaǵa qarsy shekteý sharalaryn buzýshylardy kózden jas aǵyzatyn gaz jáne sý shashý arqyly taratty.
Koronavırýs pandemııasyna baılanysty elde kóshede tórt adamnan artyq jınalýǵa tyıym salynǵan.
