Koronavırýs: AQSh Prezıdenti elde tótenshe jaǵdaı jarııalady
VAShINGTON. QazAqparat – Amerıka Qurama Shtattarynyń Prezıdenti Donald Tramp koronavırýs ınfektsııasynyń taralýyna baılanysty elde tótenshe jaǵdaı jarııalady, dep habarlaıdy QazAqparat VVS-ge silteme jasap.
Buǵan deıin D.Tramp Twitter-degi paraqshasynda juma kúni Aqúıde saǵat 15:00-de (Nur-Sultan ýaqytymen 01:00) COVID-19-dyń órshýine baılanysty baspasóz máslıhatyn ótkizetinin jazǵan bolatyn.
Tramptyń aıtýynsha, tótenshe jaǵdaıdy engizý federaldy jáne jergilikti bılik organdaryna epıdemııa jaǵdaıynda birlesken jumystardy anaǵurlym jaqsy úılestirýge septigin tıgizetin bolady.
Sondaı-aq Amerıka basshysy koronavırýsty anyqtaıtyn dıagnostıkalyq testilerdiń qosymsha jarty mıllıon jıyntyǵy aldaǵy aptanyń basynda jáne bir aı ishinde taǵy 5 mıllıony dárigerlerge jetkiziletinin málim etti. Bul rette onyń pikirinshe, olardy qoldanýdyń qajeti bolmaıdy.
AQSh Prezıdenti málim etkendeı, onyń bul jarlyǵy densaýlyq saqtaý mınıstriniń quzyretin keńeıtedi. Budan bylaı onyń qabyldaıtyn sharalary qoldanystaǵy keıbir zańdarmen jáne erejelermen shektelmeıtin bolady. Bul, densaýlyq saqtaý organdaryna anaǵurlym jedel ári ıkemdi áreket etýge múmkindik beredi.
«Tótenshe jaǵdaı Trampqa ulttyq apattarǵa qarsy qordan koronavırýspen kúreske 50 mlrd dollarǵa deıin bólýge, sondaı-aq federaldy bılikke shtattarmen jáne jergilikti organdarmen is-qımyldardy anaǵurlym tıimdi úılestirýge múmkindik ashady», - dep jazady VVS.
Búginge deıin AQSh-ta COVID-19-ǵa shaldyǵýdyń 1700 jaǵdaıy tirkelgen. Kóz jumǵandar sany 40-tan asady.
