Koronavırýs: Aqparat berýden bas tartqan adamǵa qatysty is qozǵaldy
NUR-SULTAN. QazAqparat - Nur-Sultan qalasy Taýarlar men qyzmetter qaýipsizdigi jáne sapasyn baqylaý departamentiniń basshysy Zeken Isakov koronavırýstyń taralý qaýpin azaıtý úshin qandaı sharalar qabyldanyp jatqany týraly aıtty, dep habarlaıdy QazAqparat tilshisi.
«Departament mamandary aýrý juqtyrǵandarmen qarym-qatynasta bolǵandardy anyqtaýǵa qatysty barlyq sharany qabyldaýda. Baılanysta bolǵan adamdar týraly málimet berýden bas tartqan jaǵdaı tirkeldi. Ol týraly materıal qalalyq polıtsııa departamentine jiberilip, qylmystyq is qozǵaldy», - deıdi Zeken Isakov Habar 24 arnasynda ótken onlaın brıfıngte.
Onyń aıtýynsha, Nur-Sultan qalasyna kelgen adamdardy statsıonarda bir táýlikke karantınde ustalyp, koronavırýs juqtyrǵan-juqtyrmaǵany zerthanalyq jaǵdaıda anyqtalýda.
«Nátıjesi shyqqan soń kimniń statsıonarlyq jaǵdaıda bola turýy kerek ekeni jáne kim 13 táýlik boıy úı jaǵdaıyndaǵy karantınde bolýy kerek ekeni anyqtalady. Elordaǵa kelgender ishinde tumaý belgisi, dene qyzýy kóterilip turǵan adamdar joq», - deıdi ol.
