Koronavırýs aǵzaǵa qalaı áser etedi – maman pikiri

NUR-SULTAN. QazAqparat – «Qoǵamdyq densaýlyq saqtaý joǵary mektebi» Epıdemıologııa, bıostatıstıka jáne dáleldi medıtsına kafedrasynyń dotsenti, medıtsına ǵylymdarynyń kandıdaty, dáleldi medıtsına sarapshysy Rafaıl Qypshaqbaev COVID-19 vırýsynyń aǵzaǵa qalaı áser etetinin aıtyp berdi, dep habarlaıdy QazAqparat tilshisi.

«Tájirıbe kórsetkendeı, koronavırýs ınfektsııasyn qaıta juqtyrý jaǵdaıy aldyńǵymen salystyrǵanda anaǵurlym jeńil ótedi. Adam boıyndaǵy antıdeneler deńgeıi tómendeıdi, biraq toǵyspaly ımmýnıtet saqtalady. Bul jaǵdaıda barlyǵyna vırýs juǵady. Úshinshiden, mýtatsııalanǵan vırýs jasyraq adamdarǵa da juǵýy múmkin. Buryn qant dıabeti, artyq salmaq, ilespe aýrýy barlardyń qaýipti topta ekeni aıtylsa, qazir mýtatsııalanǵan vırýs úshin mundaı sharttylyq azaıady. Koronavırýsty qaıta juqtyrý burynǵydan ońaıyraq ótedi», - deıdi R. Qypshaqbaev.

Suhbat barysynda dáriger «Kovıdti saýsaqtar» sımptomynyń qalaı paıda bolatynyn túsindirdi. Qarasha aıyndaǵy derekter boıynsha, COVID-19 juqtyrǵan 12 myń adamnyń aıaǵyndaǵy úsik shalý belgilerin eske túsiretin qatty titirkený men qyzarý paıda bolǵan. Dermatologtar bul qubylysty «Kovıdti saýsaqtar» dep atady. Naýqastar saýsaqtary men barmaqtarynda paıda bolǵan qyzyl jáne kúlgin túınekter aýyratynyn, biraq qyshymaıtynyn aıtqan. Bórtpe jazylǵan soń, teriniń joǵarǵy qabattary túsýi múmkin.

Dárigerdiń aıtýynsha, koronavırýs neırotroptyq vırýs bolyp sanalady. Ol júıke joldaryna teris áserin tıgizedi. Bul jaǵdaıda neırotrofıka, zat almasý jumysy buzylady dep boljaýǵa bolady. ıAǵnı ol «Kovıdti saýsaqtar» túrinde kórinis tabady.

Sonymen birge Rafael Qypshaqbaev ımmýnıtetti kóterýdiń jáne nyǵaıtýdyń qarapaıym ádisterin atady.

«Immýnıtetti kóteretin sıqyrly dári joq, ımmýnıtet kóteredi dep jarnamalanyp jatqan zattar da olaı jumys istemeıdi. Bul feık. Immýnıtetti nyǵaıtyp, kóterý úshin qarapaıym erejelerdi ustaný jetkilikti: qalypty jáne durys tamaqtaný, durys uıqy (kem degende 6-8 saǵat), fızıkalyq belsendilik. Qart adamdar kóshede uzaq ýaqyt serýendese jetkilikti, al jastarǵa júgirý qajet. Barlyq qarapaıym sharalar ımmýnıtettiń kez kelgen ınfektsııalarmen kúresýge daıyn etedi. Sıqyrly dári retinde satylatyn nárseniń bári – marketıng», - deıdi Rafaıl Qypshaqbaev.

Buǵan deıin Rafaıl Qypshaqbaev koronavırýstyń mýtatsııasy men kezekti tolqynynyń aldyn alý jóninde suhbat bergen edi.

«Koronavırýs jóninde pikir bildirý óte qıyn. Bul degenimiz qaıyry joq, jańa ári zerttelmegen is. Biz qazir tek boljam jasaı alamyz. Qolda bar derekterge súıene otyryp, qandaı da bir stsenarıı qurýǵa bolady, biraq eshkim naqty eshteńe aıta almaıdy. Sondyqtan ınfektsııa taralady degen boljam bar. Ázirge eń yqtımal boljam osy», - deıdi sarapshy.