Koronavırýs adamnyń boıynda kórinbeı tirshilik etedi: Kamaljan Nadyrov halyqty saqtanýǵa shaqyrdy
«Qurmetti dostar, áriptester! Ózderińiz biletindeı, qazir men elordadaǵy statsıonarlardyń birinde jatyrmyn. Maǵan qatysty jańalyq osynshama rezonans týǵyzar dep oılaǵan joqpyn. Qoldaý bildirgen lebizderdi oqyp jatyrmyn. Qoldaýlaryńyz maǵan kúsh beredi. Sizderge kóp rahmet», - dep jazdy Kamaljan Nadyrov Facebook paraqshasynda.
Burynǵy vıtse-mınıstr aýrýdy jeńil kóterip jatqanyn aıtady.
«Dárigerler barynsha jigerli ári úılesimdi, kásibı jumys isteýde. Osy ýaqytqa deıin sheberligin shyńdaǵany kórinip tur. Olar naǵyz Batyrlar! Olarǵa taǵzym etem. Qyzmet babymen aımaqtardy aralap, áriptestermen kezdesip, aýrýhanalarda boldym. Aýrýdy juqtyryp alý qaýpin eskere otyryp, COVID-19 boıynsha qaıta-qaıta testileýden de ótip júrdim. Buryn test nátıjeleriniń bári de juqtyrmaǵanymyzdy kórsetken edi. Biraq keshe keshke nátıje basqasha bolyp shyqty. Bul bizdiń kózge kórinbeıtin jaýymyzdyń qanshalyqty zulym ekenin taǵy bir márte kórsetip otyr», - deıdi ol.
Kamaljan Nadyrov emhanaǵa jatpaǵanda Almaty qalasynyń qoǵamdyq densaýlyq saqtaý basqarmasynyń basshysy qyzmetinde jumysyn bastaýy kerek edi.
«Qalaı saýyǵam, solaı qatarǵa qaıta qosylyp, ózime tapsyrylǵan aýmaqta jumysymdy jalǵastyra beremin. Ázirshe qashyqtan eńbek etemin. Qazaqstandyqtarǵa taǵy da aıtarym: vırýs biz oılaǵannan da jaýyz. Onyń keı adamnyń boıynda kórinbeı tirshilik etýi – bizdiń dıagnostıkany kúrdelendire túsedi. Sol sebepti aldyn alýdyń barlyq qamyn qarastyrǵan abzal. Oqshaýlaný kerek. Ózderińizdi saqtańyzdar!» - dep jazady Kamaljan Nadyrov.