Koronavırýs: Abaev qazaqstandyqtardy dúrbeleńge salynbaýǵa shaqyrdy

NUR-SULTAN. QazAqparat – QR Aqparat jáne qoǵamdyq damý mınıstri Dáýren Abaev qazaqstandyqtardy koronavırýs ınfektsııasynyń taralýyna qatysty dúrbeleńge salynbaýǵa shaqyrdy, dep habarlaıdy QazAqparat.

«Halyqtyń reaktsııasy túsinikti, bul jaǵdaıda qorqynyshtyń bolýy qalypty, onda kinálaıtyndaı jáne uıatty eshteńe joq. Biraq, qorqynyshtyń ártúrli bolatynyn túsiný kerek. Qazir siz ben biz úreıden arylýǵa tıispiz. Óıtkeni qorqynysh máselege baıypty jáne naqty qaraýǵa múmkindik bermeıdi», - dedi vedomstvo basshysy «Habar» telearnasyndaǵy «Ashyq dıalog» baǵdarlamasynda.

Mınıstr qorqynyshty jeńý - bul bórikti aspanǵa laqtyryp, jalǵan batyldyqty kórsetý emestigin atap ótti.

«Búgingi tańda qazaqstandyqtardan qandaı da bir qaharmandyqty eshkim talap etpeıdi. Bar bolǵany qarapaıym qaǵıdalardy ustaný kerek. Bul erejeler esh qıyn emes jáne ony barlyǵy jaqsy biledi», - dedi D. Abaev.