Koronavırýs: 70 naýqas ókpeni jasandy jeldetý apparatyna qosyldy

NUR-SULTAN. QazAqparat – Koronavırýsqa shaldyqqan naýqastardyń arasynda 246 adamnyń densaýlyǵy nashar. Bul týraly Densaýlyq saqtaý mınıstrliginiń resmı ókili Baǵdat Qojahmetov málim etti, dep habarlaıdy QazAqparat tilshisi.

«Resmı statıstıkaǵa keletin bolsaq, bıylǵy 13 naýryzynan bastap Qazaqstanda koronavırýstyq ınfektsııamen 99 442 adam aýyrdy. Jazylyp shyqqan naýqastardyń sany 72 523 nemese 72,9 paıyz. Statsıonarlarda 4 713 adam em qabyldaýda jáne 20 937 ambýlatorlyq jaǵdaı emdelýde», - dedi remı ókil Ortalyq kommýnıkatsııalar qyzmetinde.

Onyń sózine qaraǵanda, naýqastardyń arasynda 246 adamnyń densaýlyǵy nashar, 69 adamnyń densaýlyǵy óte nashar dep baǵalandy. Jalpy 70 naýqas ókpeni jasandy jeldetý apparatynda jatyr.

Sońǵy bir táýlikte COVID-19 vırýsyn 741 adam juqtyrdy.

«Dúnıejúzilik densaýlyq saqtaý uıymynyń usynysy boıynsha 1 tamyzdan bastap koronavırýstyq ınfektsııa jáne oǵan uqsas belgileri bar pnevmonııa derekterin statıstıka qataryna qostyq. Osydan keıin elimiz indettiń taralýy kórsetkishi boıynsha álemdik reıtıngte bir satyǵa ǵana kóterildi. Buǵan deıin biz 27-orynda bolsaq, qazir 26-shy orynǵa turaqtadyq. Biraq, bul kórsetkishke qarap jigerdi jasytýǵa bolmaıdy, biz úshin eń mańyzdysy – kúresti kúsheıtip, jaǵdaıdy odan ári jaqsartý. Qabyldanǵan sharalardyń nátıjesinde qazir qolymyzda jan-jaqty saralanǵan málimetter bar», - dedi Baǵdat Qojahmetov.

Eske salsaq, Qazaqstanda koronavırýsty juqtyrý ósimi toqtady.