Koronavırýs: 374 adam jansaqtaý bóliminde jatyr

NUR-SULTAN. QazAqparat – QR Densaýlyq saqtaý birinshi vıtse-mınıstri Marat Shoranov Qazaqstandaǵy epıdemıologııalyq jaǵdaıdy baıandady, dep habarlaıdy QazAqparat tilshisi.

«27 qańtardaǵy jaǵdaıǵa sáıkes, Qazaqstan Respýblıkasynda 181 117 adamda KVI+ jáne 47 575 adamda KVI- anyqtaldy. KVI+ boıynsha 163 156 adam jáne KVI- 35 348 adam jazylyp shyqqan. Juqpaly aýrýlar aýrýhanasyndaǵy tósek-orynnyń 31% (6 492 oryn) tolǵan, al jansaqtaý bóliminiń 20%-ynda 374 adam hal ústinde jatyr», - dedi vıtse-mınıstr Ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, sońǵy 2 aıda koronavırýs ınfektsııasy boıynsha epıdemıologııalyq jaǵdaıdyń nasharlaýy baıqalady. Qazaqstan Respýblıkasy tómen táýekel aımaǵynan nemese jasyl aımaqtan joǵary táýekel aımaǵyna nemese qyzyl aımaqqa kóshken.

«Álemde aýrýdyń ósýi jalǵasýda. Búgingi kúni álemniń 221 elinde 100 mln-nan astam KVI jaǵdaıy tirkelgen, syrqattanýdyń ósýi – 0,5- quraıdy. 2 mıllıon 165 myńnan astam adam qaıtys boldy, ólim kórsetkishi – 2,1%.

Eýropa men Azııanyń keıbir elderinde aýrýdyń ósýi áli de jalǵasýda. Dúnıejúzilik densaýlyq saqtaý uıymynyń alty óńiriniń úsheýinde (Amerıkada, Tynyq muhıtynyń batys bóliginde jáne Afrıkada) COVID-19 vırýsymen halyqtyń syrqattanýy turaqty ósip keledi», - dedi M. Shoranov.