Koronavırýs: 131 adam aýrýhanadan shyǵaryldy

NUR-SULTAN. QazAqparat - Ýhannan evakýatsııalanǵan Qazaqstannyń 83 azamatynyń 12-si JRVI-ge baılanysty em qabyldap jatyr. Bul týraly QR Densaýlyq saqtaý mınıstrliginiń resmı ókili Dıas Ahmetshárip aıtty, dep habarlaıdy QazAqparat tilshisi.

«Medıtsınalyq uıymdar Qytaıdan 6 qańtardan keıin turǵylyqty jerine kelgen azamattardyń densaýlyǵyn baqylaýdy jalǵastyrýda. Barlyǵy 24 154 adamǵa baqylaý jasaldy. 15 878-i monıtorıngten shyǵaryldy. Sońǵy 14 kúnde 8 276 adam qaralyp, 1 609 adam medıtsınalyq tirkeýge alyndy. Jalpy, 13 aqpanda 151 adam dene qyzýy kóterilip, JRVI belgilerimen aýrýhanaǵa tústi. 131 adam aýrýhanadan shyǵaryldy. 20 adam aýrýhanada. Naýqastardyń jaǵdaıy jaqsy»,- dedi mınıstrliktiń resmı ókili.

Onyń atap ótýinshe, evakýatsııalanǵan Qazaqstan Respýblıkasynyń 83 azamatynyń 12-si JRVI-ge baılanysty em qabyldap jatyr. Sondaı-aq Ýhannan evakýatsııalanǵan Belarýstyń 5, Armenııanyń 1 azamatynyń jaǵdaıy jaqsy.

«Ýhannan evakýatsııalanǵan Qazaqstan Respýblıkasynyń Reseıdiń Túmen qalasyndaǵy - 3, Ózbekstannyń Tashkent qalasyndaǵy 5 azamatynyń densaýlyqtary jaqsy. Olardyń shaǵymdary joq», - dedi Dıas Ahmetshárip.