Korol Fılıpp Qazaqstanmen qaı salalarda seriktestikti kúsheıtkisi keledi
ASTANA. KAZINFORM — Korol Fılıpp Qazaqstan-Belgııa iskerlik keńesiniń tórtinshi otyrysynda Brıýsselde jáne Astanada Eýropa men Ortalyq Azııa arasyndaǵy baılanystardy nyǵaıtýǵa qajetti alǵysharttardyń barlyǵy bar ekenin atap ótti, dep habarlaıdy Aqordanyń baspasóz qyzmeti.
— Eýropalyq odaqtyń dál ortasynda ornalasqan Belgııa Eýropa naryǵyna shyǵatyn qaqpa retinde eleýli ról atqarady. Sondaı-aq tehnologııa, ınnovatsııa, taza energetıka, logıstıka jáne halyqaralyq saýda salasynda aıtarlyqtaı tájirıbege ıe. Al Qazaqstan eýrazııalyq keńistiktiń mańyzdy aýmaǵy sanalady. Geografııalyq turǵydan ońtaıly ornalasýynyń jáne mol tabıǵı resýrstarynyń arqasynda Qazaqstan álem ekonomıkasynda erekshe orny bar aımaqtyq saýda, ınvestıtsııa jáne jasyl ekonomıkany damytý ortalyǵyna aınaldy. Munyń bári yntymaqtastyqty odan ári tereńdetýge shynaıy negiz bolady, — dedi ol.
Belgııalyqtar Koroli eki eldiń bıznes ókilderin energetıka, asa mańyzdy mıneraldar, kólik-logıstıka, qarjy jáne týrızm sııaqty perspektıvti salalarda yqpaldastyqty jandandyrýǵa shaqyrdy.
— Belgııa men Qazaqstannyń arasy geografııalyq jaǵynan alshaq bolǵanymen, maqsat-murattarymyz, amal-áreketterimiz jáne tabandylyǵymyz turǵysynan óte jaqyn eldermiz, — dedi Korol Fılıpp.
Buǵan deıin Toqaev pen Korol Fılıpp Qazaqstan-Belgııa iskerlik keńesiniń tórtinshi otyrysyna qatysqanyn jazǵanbyz.
Otyrys barysynda Prezıdent Qazaqstannyń eki portyn Belgııanyń iri logıstıkalyq ortalyǵymen baılanystyrýdy usyndy.
