Korol Artýr men Qasıetti Graal týraly qoljazba 2,7 mln dollarǵa aýktsıonǵa qoıylady
ASTANA. KAZINFORM — Korol Artýr, Merlın jáne Qasıetti Graal týraly ortaǵasyrlyq sırek qoljazba birneshe ǵasyrdan keıin alǵash ret aýktsıonǵa qoıylady, dep habarlaıdy CNN.
XIII–XIV ǵasyrlarǵa jatatyn biregeı qoljazba shamamen 700 jyl boıy jeke kollektsııada saqtalyp kelgen. Endi ol 2,7 mıllıon dollarǵa satylýy múmkin.
Korol Artýr týraly sırek manýskrıpt shilde aıynda Christie’s ótkizetin Londondaǵy saýdanyń basty loty bolmaq.
«Klermon-Tonner Graali» degen ataýmen belgili bul qoljazba Korol Artýr, sıqyrshy Merlın, Dóńgelek ústel rytsarlary jáne Qasıetti Graaldy izdeý týraly ańyzdarǵa qatysty saqtalǵan eń kóne mátinderdiń biri sanalady.
Christie’s málimetinshe, qoljazba shamamen 1290–1310 jyldar aralyǵynda jazylǵan. Mátin kóne frantsýz tilinde jazylyp, eýropalyq ádebıet pen mádenıetke zor yqpal etken Lanselot–Graal tsıkliniń quramyna kiredi.
Manýskrıpt pergamentke jazylyp, altyn jalatylǵan órnektermen bezendirilgen. Kitapta 126 ıllıýstratsııa saqtalǵan. Christie’s sarapshylary bul qoljazbany kópshilikke beımálim jádiger dep baǵalaıdy. Ol buryn-sońdy keń aýdıtorııaǵa kórsetilmegen jáne mamandar tarapynan da tolyq zerttelmegen.
Qazirgi ýaqytta osyndaı qoljazbalardyń nebári úsheýi ǵana jeke kollektsııalarda saqtaýly. Al satylymǵa shyǵarylyp otyrǵan nusqa olardyń ishindegi eń kóne úlgisi bolyp esepteledi.
Sarapshylar aýktsıonǵa mýzeıler, kitaphanalar jáne jeke kollektsıonerler tarapynan úlken qyzyǵýshylyq bolady dep kútýde.
Christie’s aýktsıony 8 shilde kúni London qalasynda ótedi.
Aıta keteıik, Eıfel munarasynyń bir bóligi aýktsıonda 450 myń eýroǵa satyldy.
