Kórineý jalǵan aqparat taratý boıynsha jaza jeńildetile me
ASTANA. KAZINFORM — QR Qylmystyq kodeksiniń 274-babyn qarastyrý máselesi jóninde QR mádenıet jáne aqparat birinshi vıtse-mınıstri Qanat Ysqaqov málimdedi.
— Mınıstrlik «Kórineý jalǵan aqparat taratý» baby boıynsha jazany jeńildetýge qarsy emes. Biraq bul sheshimdi Mádenıet jáne aqparat mınıstrligi emes, Úkimet jáne depýtattar qabyldaıdy, — dep túsindirdi ol Májilis kýlýarynda jýrnalıster suraǵyna jaýa bere otyryp.
Aıta keteıik, Qylmystyq kodekstiń 274-babyna sáıkes, kórineý jalǵan aqparat taratqan azamattarǵa jaza qarastyrylǵan. Olarǵa bir myń AEK-ge deıin aıyppul salynady nemese sol mólsherde túzeý jumystaryna ne tórt júz saǵatqa qoǵamdyq jumystarǵa tartylady. Ne bolmasa, bir jylǵa deıin bas bostandyǵyn shekteý ne sol merzimge bas bostandyǵynan aıyrý jazasy taǵaıyndalýy yqtımal.
Al BAQ arqyly kórineý jalǵan aqparat taratqandar tartylatyn jaýapkershilik odan da qatań. Ondaı jaǵdaıda úsh myń AEK-ge deıin aıyppul salynýy yqtımal. Tipti, úsh jylǵa deıin bas bostandyǵyn shekteý nemese bas bostandyǵynan aıyrý jazalary da qarastyrylǵan.
Eske salaıyq, buǵan deıin Semeı turǵyny «órtten 18 adam qaza tapty» degen jalǵan aqparat taratqany úshin jazalanǵanyn jazǵanbyz.
