Kornavırýstan keıingi ımmýnıtet qysqa merzimdi bolady - Aıjan Esmaǵambetova

NUR-SULTAN. QazAqparat – QR Densaýlyq saqtaý mınıstrligi Sanıtarlyq-epıdemıologııalyq baqylaý komıtetiniń tóraıymy Aıjan Esmaǵambetova koronavırýs ınfektsııasy qaıtadan juǵýy múmkin ekenin eskertti, dep habarlaıdy QazAqparat tilshisi.

«Árbir jaǵdaı boıynsha tyńǵylyqty tekserý júrgiziledi, ıaǵnı indet qashan juqqany, aýrýǵa shaldyǵýdyń ár jaǵdaıy arasynda qansha ýaqyt ótkeni qaralady. Osy oraıda álem elderinde indetti qaıta juqtyrý oqıǵalary tirkelip jatqanyn túsiný kerek. Bul óz kezeginde aýrýdy eńsergennen keıingi ımmýnıtet uzaq emes, qysqa merzimdi ekeni taǵy da rastalyp otyr», - dedi komıtet basshysy Ortalyq kommýnıkatsııalar qyzmetinde.

Onyń sózine qaraǵanda, halyqaralyq zertteýlerge sáıkes, aýrýdan emdelgennen keıingi ımmýnıtet 1-den 3 aıǵa deıin saqtalady.

«Іndetti qaıta juqtyrý múmkindigi bar ekenin bilemiz. Aýrýdan emdelgen adamdar barlyq aldyn alý sharalaryn saqtaý kerektigin este saqtaǵany durys», - dedi A. Esmaǵambetova.

Budan buryn habarlanǵandaı , QR Densaýlyq saqtaý vıtse-mınıstri Ajar Ǵınııat koronavırýsty qaıta juqtyrý deregi Qaraǵandy oblysynda tirkelgenin aıtty. Al Batys Qazaqstan oblysyndaǵy jaǵdaı rastalmady.