Kornavırýs: Mańǵystaýda 5 adam jansaqtaý bóliminde jatyr

AQTAÝ. QazAqparat - Mańǵystaýda 22 qazandaǵy jaǵdaıǵa sáıkes I-II deńgeıli ınfektsııalyq statsıonarlarda 62 adam em qabyldap jatyr, dep habarlaıdy QazAqparat tilshisi.

Oblystyń densaýlyq saqtaý basqarmasynyń málimetinshe, sol 62 naýqastyń ishinde 6-da koronavırýsqa tapsyrǵan synama oń nátıje kórsetken. Al qalǵan 56 adamda koronavırýstyq pnevmonııa anyqtalǵan.

«Qazirgi ýaqytta jansaqtaý bóliminde 5 naýqas jatyr. Onyń 4-niń jaǵdaıy aýyr, taǵy 1 naýqas óte aýyr hálde dep baǵalanýda. Úı karantıninde oqshaýlanyp otyrǵan 12 adam bar. Bul bólimge túskenderdiń nasharlaýyna jedel tynys jetispeýshiligi jáne ilespe aýrýlardyń bolýy sebep», - delingen habarlamada.

Búginde aımaqtyń oqshaýlaý oryndaryndaǵy tósek-oryn júktemesi 29 paıyzdy quraıdy. Oblys kóleminde 215 ınfektsııalyq І-ІІ satyly tósek oryn bar. Sondaı-aq, reanımatsııalyq tósek sany 43.Anyqtamasyz shetelden kelgen Qazaqstan Respýblıkasynyń azamattary men shetel azamattaryna arnalǵan karantındik statsıonarlarda barlyǵy 270 tósek oryn bar.