Jasandy ıntellekt sporttaǵy jaraqat qaýpin anyqtaýǵa múmkindik beredi

MINSK. KAZINFORM — «INNOPROM.Belarýs» kórmesinde sporttyq jaraqattardyń aldyn alý úshin qazaqstandyq IT-startap usynyldy. Bul týraly Úkimettiń baspasóz qyzmeti habarlady. 

Mınskide ótken «INNOPROM.Belarýs» halyqaralyq kórmesinde qazaqstandyq ázirleýshiler sportshylar jaraqatyn dıagnostıkalaýǵa jáne onyń aldyn alýǵa arnalǵan jasandy ıntellekt negizindegi ınnovatsııalyq júıeni tanystyrdy. Joba Memleket basshysynyń barlyq salany, sonyń ishinde sport pen medıtsınany tsıfrlandyrý jónindegi tapsyrmalary aıasynda júzege asyrylyp jatyr.

Jańa tehnologııa keshendi bıomehanıkalyq taldaýǵa negizdelgen. Sporttyq jabdyqqa biriktirilgen arnaıy sensorlar kómegimen júıe 20 myńnan astam biregeı qozǵalys parametrlerin jınaıdy jáne óńdeıdi. Ári qaraı, mashınalyq oqytý algorıtmderi kózben kórý arqyly baıqalmaıtyn eń kishkentaı asımmetrııalardy anyqtaı otyryp, alynǵan derekterdi taldaıdy. Tereń taldaý jaraqat alý qaýpin joǵary dáldikpen boljaýǵa jáne sportshy men jattyqtyrýshyǵa jeke usynystar jasaýǵa múmkindik beredi.

— Bizdiń júıe eki mınýt jasyryn qaýip-qaterdi anyqtaý úshin jasandy ıntellekt arqyly óńdeletin úlken kólemdegi derekterdi eki mınýt ishinde jınaýǵa múmkindik beredi. Biz Astana jastar fýtbol komandasymen tabysty pılottyq joba ótkizdik. Bizdiń ónimniń qundylyǵy men nátıjesin kórsetti. Jattyqtyrýshylar rıza boldy. Endi biz kelesi jylǵa fýtbol klýbymen bir jyldyq kelisimshartty iske qosamyz, — dep atap ótti «Mirai Tech» JShS operatsııalyq dırektory Azamat Erjanov. 

Aıta ketelik kórmede jasandy ıntellektimen jabdyqtalǵan qazaqstandyq «aqyldy kaska» tanystyrylǵan edi.