Qorlar zeınetaqy qarajatyn tıimdi basqara almady - Úkimet basshysy
ASTANA. 5 mamyr. QazAqparat - Biryńǵaı zeınetaqy qoryn qurý - jekemenshik qorlarda týyndaǵan máselelerdi sheshýge baǵyttalǵan shara.
Bul týraly búgin «Habar» telearnasyndaǵy «Jeti kún» baǵdarlamasyna bergen suhbatynda Úkimet basshysy Serik Ahmetov málim etti.
«Zeınetaqy júıesin jetildirýdiń qajettiligi týyndap otyr degen sheshimge keldik. Bul árıne, óte mańyzdy ári kúrdeli másele. Sondyqtan Biryńǵaı zeınetaqy qoryn qurý - jekemenshik qorlarda týyndaǵan máselelerdi sheshýge baǵyttalǵan shara dep túsingen jón. Birinshiden, atalǵan qorlar halyqty jınaqtaýshy zeınetaqy júıesimen tolyq túrde qamtı almady. Naqty aıtar bolsaq, búginde jumys istep júrgen 8 mln. 400 myń adamnyń jartysynan astamy qazirgi zeınetaqy júıesine qatyspaı otyr. Ókinishke oraı, qorlar bul azamattarǵa kóńil bólmeı, tek bir-biriniń salymshylaryn aýystyryp alýmen ǵana aınalysýda. Bul árıne, qorlarǵa tıimdi, al budan azamattarǵa, ıaǵnı halyqqa, memleketke qandaı paıda. Máseleniń mánisi osynda»,-dedi S. Ahmetov.
Premer-Mınıstrdiń sózine qaraǵanda, ekinshiden qorlar zeınetaqy qarajatyn tıimdi basqara almady. Bul tabystyń tómendeýine alyp keldi.
«Úshinshiden, búgingi qorlarda komıssııalyq alymdar mólsheri óte joǵary. Al jaýapkershilik tómen deńgeıde. Osy jaǵdaı ár azamattyń salymdyq jınaǵyn 26 paıyzǵa deıin qysqartady. Demek, qorlar búkil qarajattyń tórtten birin ózderine alyp qalady. Bul durys emes»,-dep atap ótti Úkimet basshysy.
«Qordyń jumysyndaǵy osyndaı kemshilikterdi eskere otyryp, biryńǵaı qor qurý týraly usynys týyndady»,-dep túıdi S. Ahmetov.
