Qorqyt ata ýnıversıteti suranysqa saı mamandardyń myńdaǵan legin daıarlady - Nálibaev

QYZYLORDA. QazAqparat - Qyzylorda oblysynyń ákimi Nurlybek Nálibaev Syr eline jumys saparymen kelgen Ǵylym jáne joǵary bilim mınıstri Saıasat Nurbekpen birge Qorqyt ata ýnıversıtetiniń 85 jyldyq mereıtoıyna arnalǵan kezdesýlerge qatysty, dep habarlaıdy QazAqparat.

Aldymen oblys ákimi men mınıstr ýnıversıtettiń №5 oqý ǵımaratynda oqytýshy-ǵalym, professorlarmen kezdesip, oqý ornynyń ǵylymı-ınnovatsııalyq jetistikterimen tanysty.

Nurlybek Nálibaev 85 jyldyq tarıhy bar ýnıversıtettiń kásibı maman daıarlaýdaǵy áleýeti zor ekenin tilge tıek etip, ǵylymǵa betburys jasaǵan jastarǵa árdaıym qoldaý bolatynyn jetkizdi.

«Búgingi kúni óńirimizdiń mańdaıaldy ýnıversıteti elimiz úshin suranysqa saı mamandardyń myńdaǵan legin daıarlap, ulttyq kadrlar qalyptastyrýda. Bilim ordasynyń túlekteri egemen elimizdiń túkpir-túkpirinde san-salaly qyzmette abyroıly eńbek etýde. Olardyń arasynda memleket jáne qoǵam qaıratkerleri, Parlament depýtattary, Qazaqstannyń Eńbek Eri, Memlekettik syılyqtyń laýreattary, ǵalymdar, óner jáne mádenıet maıtalmandary, ǵylym men sport sańlaqtary, iri bıznes ókilderi bar.

Jas ǵalymdardyń ǵylymı áleýetin arttyrý maqsatynda arheologııalyq jáne agrarlyq sala jobalary qoldaý taýyp keledi. Keleshekte bıýdjet esebinen qarjylandyrylatyn ekonomıka salalary boıynsha mamandyq sanyn kóbeıtýdi josparlap otyrmyz. Agrarlyq aımaqtan óndiristi óńirge aınalǵan Syr eliniń ıgi maqsattardy júzege asyryp, ósý jolynda ýnıversıtet ınnovatsııalyq damýdyń draıverine aınalýy qajet», - dedi N.Nálibaev.

Basqosý barysynda mınıstr Saıasat Nurbek joǵary oqý oryndarynda maman daıarlaý erekshelikterimen bólisip, keleshekte óńirlik ýnıversıtetterdi qoldaý aıasy keńeıip, ǵylymı múmkindikterdi damytý máselelerin qozǵady.

Kezdesýden keıin oblys ákimi men mınıstr «Joǵary bilimge qoljetimdilikti keńeıtý: bolashaǵy men múmkindikteri», «Óńirlik ýnıversıtetter – 2032: adamı kapıtal jáne ǵylym» atty forsaıt-sessııalarǵa qatysty. Ári qaraı «Fızıka-hımııalyq taldaý ádisteri ınjenerlik beıindegi» zerthana jumysymen tanysyp, jas ǵalymdarmen pikirlesti.

Aıta keteıik, mınıstr Syr eline sapary barysynda turǵyndarmen kezdesý ótkizip, ózekti saýaldarǵa jaýap berdi. Sondaı-aq, «Open spase» zamanaýı úlgidegi kitaphanamen jáne sırek kitaptar qorymen tanysyp, bilim, ǵylym, óner, sport salasyndaǵy jeńimpaz jastarmen kezdesti. Munan keıin ýnıversıtettiń 85 jyldyǵyna arnalǵan saltanatty jıynǵa qatysty.

Saltanatty jıynda Parlament Senatynyń depýtaty, saıası ǵylymdar doktory, professor Murat Baqtııarulyna, eki márte Memlekettik syılyqtyń ıegeri, Qazaqstannyń eńbek sińirgen qaıratkeri, bıologııa ǵylymdarynyń doktory, professor Amankeldi Sadanovqa, Qazaqstannyń eńbek sińirgen qaıratkeri, fılologııa ǵylymdarynyń doktory, professor Baǵdat Káribozulyna «Qorqyt Ata atyndaǵy Qyzylorda ýnıversıtetiniń Qurmetti professory» ataǵy tabystaldy.

Eske salaıyq, sońǵy 3 jylda aımaqtyń áleýmettik-ekonomıkalyq damýyn aıqyndaıtyn, óńirge qajetti mamandyqtar boıynsha halyqtyń áleýmettik osal toptarynan shyqqan stýdentterge 360 oblys ákiminiń granty taǵaıyndaldy. Bólingen granttardyń 216-sy Qorqyt ata atyndaǵy Qyzylorda ýnıversıtetine berildi.