«Qorqyt Ata» áýejaı termınalynyń qurylysy jalǵasyn tabady-Qyzylorda
QYZYLORDA. QazAqparat-Oblys ortalyǵyndaǵy áýejaı termınalynyń qurylysyn memlekettik-jekemenshik áriptestik mehanızmi arqyly iske asyrý josparlanyp otyr. Bul týraly QazAqparat jolaýshylar kóligi jáne avtomobıl joldary basqarmasyna silteme jasap habarlady.
Oblys ákimdigi bıýdjetten tys qarjy kózderi esebinen jobanyń 7,5 mlrd. teńge bolatyn memlekettik saraptamadan ótkizilgen tehnıkalyq-ekonomıkalyq negizdemesin ázirledi.
Osydan eki jyl buryn, oblys ákimdiginiń bastamasymen Qazaqstan Respýblıkasy Úkimetiniń «Memlekettik múlikti respýblıkalyq menshikten kommýnaldyq menshikke berýdiń keıbir máseleleri týraly» №871 qaýlysy qabyldandy. Sonyń negizinde «Qorqyt Ata áýejaıy» AQ-nyń respýblıkalyq menshiktegi 100 paıyz aktsııasy kommýnaldyq menshikke berildi.
2015 jyldyń 14 jeltoqsanynda Qyzylorda oblysynyń jolaýshylar kóligi jáne avtomobıl joldary basqarmasy men «Kazakhstan Project Preparation Fund» JShS arasynda Qyzylorda qalasynda ótkizý qabilettiligi saǵatyna 250 jolaýshyny quraıtyn jańa jolaýshylar termınaly qurylysynyń tujyrymdamasyn ázirleý jáne jobany súıemeldeý kelisimsharty jasalǵan bolatyn.
Osy maqsatqa 2015-2017 jyldar aralyǵynda oblystyq bıýdjetten 87,0 mln teńge qarjy qaralyp, jumystar júrgizilýde.
