Qorqyt Ata atyndaǵy memlekettik ýnıversıtet 80 jyldyǵyn atap ótýde
QYZYLORDA. QazAqparat-Qyzylordada Qorqyt Ata atyndaǵy memlekettik ýnıversıtettiń 80 jyldyq mereıtoıy aıasynda halyqaralyq ǵylymı-tájirıbelik konferentsııa ótti, dep habarlady QazAqparat tilshisi.
«Básekege qabiletti mamandardy daıarlaýdyń ózekti máseleleri men perspektıvalary» taqyrybyndaǵy shara barysynda Qazaqstan, Reseı, Koreıa, Belgııa, Túrkııa jáne taǵy basqa elderdegi JOO-lar basshylary baıandama jasady.
Qyzylorda oblysynyń ákimi Qyrymbek Kósherbaev aımaqtyń aldyńǵy qatarly oý ornyn mereıtoımen quttyqtap, básekege qabiletti maman daıarlaýdaǵy ýnıversıtettiń jetistikterin atap ótti.
«Elbasymyz N.Á.Nazarbaev adamı kapıtaldyń qundylyǵyn jaqsartýǵa, eń aldymen jastardyń bilim deńgeıin kóterip, básekege qabiletti maman daıarlaýǵa asa mán beredi. Qorqyt Ata atyndaǵy Qyzylorda memlekettik ýnıversıteti aldaǵy ýaqytta da bul qurmetti mıssııany abyroımen atqaratynyna senimdimin», - dep atap ótti aımaq basshysy.
Aıta keteıik, merekelik sharalar baǵdarlamasy belgili ǵalym-matematık Asan Dabysuly Taımanovtyń 100 jyldyǵy qurmetine uıymdastyrylatyn «Taımanov oqýlary» sharasymen jalǵasatyn bolady. A.Taımanov 1947 -1954 jyldar aralyǵynda ýnıversıtettiń joǵary matematıka kafedrasynyń meńgerýshisi bolǵan.
Qorqyt Ata atyndaǵy Qyzylorda memlekettik ýnıversıtetiniń qurylý tarıhy 1937 jyly Qıyr Shyǵystaǵy Koreıa ınstıtýtyn Qyzylordaǵa kóshirýden bastalady. 1998 jyldyń 24 naýryzynda Qorqyt Ata atyndaǵy Qyzylorda gýmanıtarlyq ýnıversıteti Ybyraı Jaqaev atyndaǵy Qyzylorda polıtehnıkalyq ınstıtýtymen birigip, Qorqyt Ata atyndaǵy Qyzylorda memlekettik ýnıversıteti bolyp qaıta quryldy. Qazirgi tańda ýnıversıtette 4649 stýdent, magıstrant jáne doktorant oqýda, oqý ordasynda 7 fakýltet jáne 30 kafedra jumys isteıdi.
