Kóriktendirý tólqujaty: Almatyda ǵımarat ıeleri tazalyqqa jaýapty bolady
ALMATY. KAZINFORM — Almatyda «Taza Qazaqstan» baǵdarlamasy men jańa kóriktendirý erejesi aıasynda qalalyq nysandardy tólqujattaý bastaldy. Bul týraly Almaty qalasynyń ákimdigi habarlady.
Tólqujattaý úderisi úsh kezeńge bólingen. Birinshi kezeńde magıstraldy kóshelerdegi, qalalyq mańyzy bar aımaqtarda jáne jaıaý júrginshiler keńistiginde myńnan astam nysan qamtylady. Ekinshi kezeńde aýdandyq mańyzy bar kóshelerge mán beriledi, al sońǵy kezeńde jergilikti mańyzy bar kósheler men aýlaishilik aýmaqtar qamtylady. Baǵdarlamany tolyq aıaqtaý 2025 jyldyń sáýirine josparlanǵan.
— Tólqujattaýdyń negizgi mindeti — kásipkerlerge irgeles aýmaqtardy kóriktendirý boıynsha jaýapkershilik shegin anyqtaý. Almatynyń kommýnaldyq ınfraqurylymdy damytý basqarmasynyń málimetinshe, barlyǵy 5 590 kásipkerlik nysandy tólqujattaý qajet. Qazir myńǵa jýyq kásipker tólqujatqa qol qoıdy. Tólqujattaý jumystary kelesi jyldyń sáýir aıynda aıaqtalady, — dep habarlady ákimdikten.
Bıznes jaýapkershiligi qandaı bolmaq?
Almaty ákimdiginiń málimetine sáıkes, árbir bıznes sýbektisi kóriktendirý tólqujatyn alýǵa jáne irgeles aýmaqty tıisti jaǵdaıda ustaýǵa mindetti. Atap aıtqanda, ǵımarattardyń jáne qurylystardyń ıeleri qasbetterdiń ýaqtyly jóndelýi men syrlanýyna, olardyń tıisti kútip ustaý men paıdalanylýyn qamtamasyz etýge mindetti. Sondaı-aq qasbetterdegi eskertkish taqtalardy, kóshe kórsetkishterin, nómirlik belgilerdi, mańdaıshalardy jáne aqparattyq taqtalardy taza ári jaramdy jaǵdaıda ustaýǵa tıis.
— Taǵy bir mańyzdy nárse — qys kezinde ǵımarattar men qurylystardyń ıeleri qar men muzdy shatyrdan tazartý jumystary bastalǵanǵa deıin turǵyn jáne turǵyn emes ǵımarattardyń ıelerin 24 saǵat buryn habardar etýge mindetti, — dep habarlady qala ákimdigi.
Kóriktendirý jónindegi talaptardyń oryndalýyn aýdan ákimdikteriniń kóriktendirý jáne ekologııa bólimderi qadaǵalaıdy. Ereje buzǵan kásipkerler QR Ákimshilik quqyq buzýshylyq týraly Kodeksine sáıkes ákimshilik jaýapkershilikke tartylady.
Tólqujatta sýbektiniń ataýy, mekenjaıy, baılanys telefony, menshik ıesiniń málimetteri, QTQ shyǵarý týraly kelisim-shart, qatty jabynnyń aýdany, kógaldyń aýdany, aǵashtar men butalar sany, shaǵyn sáýlet pishinderiniń bolýy jáne bekitilgen aýmaqtyń syzbasy kórsetiledi. Tólqujatqa aýdan ákimdigi men kásipker birlesip qol qoıady.
Aıta ketken jón, jańa kóriktendirý erejelerine sáıkes, buqaralyq is-sharalardy uıymdastyrýshylar kontsertter, festıvaldar jáne jármeńkelerden keıin tazalyq jumystaryn júrgizýge mindetti.
