Qorqor tartýǵa ruqsat etilgen oryn ıeleri tekseristiń jıilep ketýine shaǵymdandy
NUR-SULTAN. QazAqparat - Elordadaǵy qorqor tartýǵa ruqsat etilgen kóńil kóterý oryndaryna polıtsııa tarapynan tekseris pen ákimshilik jaýapkershilikke tartý jaǵdaılary jıilep ketti.
Bul týraly búgin Nur-Sultan qalalyq kásipkerlerdiń quqyǵyn qorǵaý jáne sybaılas jemqorlyqqa qarsy is-qımyl keńesiniń otyrysynda «QR Restoratorlar klýby» ZTB prezıdenti Veronıka Nurpeıisova aıtty, dep habarlaıdy QazAqparat tilshisi.
«Bul oryn-jaılardyń barlyǵyn qaıta jabdyqtaý úshin óte kóp qarajat qajet. Sondyqtan kúshtik qurylymdardyń teksermeýine ýaqytsha moratorıı engizýdi suraımyz. Qazirgi ýaqytta kúshtik qurylymdar dóreki túrde keledi, eshqandaı uıǵarymdary joq. Tipti qandaı komanda nemese top bolýy kerektigin, ol qandaı adamdardan jasaqtalýy kerektigin bilmeımiz», - dedi ol.
Onyń aıtýynsha, quqyq qorǵaý organdary jazyp beretin aıyppuldyń kólemi 1 aılyq eseptik kórsetkishten bastalyp, 30 AEK-ke jetip jyǵylady.
«Temeki, sonymen qatar temeki emes qorqor qospasy degen túsinik bar. Qazirgi ýaqytta bizde Reseıdegideı jasaý qajet. Ol jaqta bul temeki, biraq jemisten jasalǵan tuzdyqpen jáne shárbatpen aralastyrylǵan dep bólip tastaǵan. Bizde zańnamalyq turǵyda nıkotıni bar temeki jáne temekisiz qorqor dep bólip tastaýdy usynamyz», - dedi Veronıka Nurpeıisova.
Al Nur-Sultan qalalyq jergilikti polıtsııa qyzmeti basqarmasynyń bastyǵy Tahır Ábdirahmanov kóńil kóterý oryndaryn tekserý negizinen azamattardyń shaǵymdary boıynsha jáne zańnama talaptary qatań saqtala otyryp tekseriletindigin aıtyp otyr.
