Qorqor shekken Taraz qalasynyń 17 turǵyny aıyppul tóleıdi
TARAZ. QazAqparat –Taraz qalasynyń 17 turǵyny qorqor shekkeni úshin aıyppul tóleıdi, dep habarlaıdy QazAqparat tilshisi.
«Qarasora-2021» respýblıkalyq jedel aldyn alý is-sharasy aıasynda Jambyl oblysynyń Polıtsııa departamenti Esirtki qylmysyna qarsy is-qımyl basqarmasynyń jáne Taraz qalasy PB jergilikti polıtsııa qyzmeti bóliminiń qyzmetkerleri qaladaǵy kóńil kóterý oryndarynda quqyq buzýshylyqtardy anyqtaýǵa baǵyttalǵan reıdtik is-sharalar ótkizdi.
Tekserý barysynda 15 kafe men barda qoǵamdyq oryndarda qorqor (kalıan) tutynýǵa tyıym salýdyń 17 buzýshylyq deregi anyqtaldy. 17 adam ákimshilik jaýapkershilikke tartyldy, endi olar 15 AEK (43 755 teńge) mólsherinde aıyppul tóleıtin bolady.
«Tekserilgen barlyq oıyn-saýyq mekemelerinde qoǵamdyq oryndarda kalıan shegýge tyıym salý týraly aqparattyq paraqshalar taratyldy. Sondaı-aq atalǵan mekemelerdiń ákimshiligine QR ÁQBtK-niń 422-baby boıynsha ákimshilik jaýapkershilik týraly (Esirtki quraldaryn, psıhotroptyq zattar men prekýrsorlardy ótkizýdiń jáne (nemese) medıtsınalyq emes turǵydan tutynýdyń jolyn kesýge sharalar qoldanbaý), sondaı-aq QR QK-niń 299-1-baby boıynsha qylmystyq jaýapkershilik týraly (Esirtki quraldaryn nasıhattaý jáne zańsyz jarnamalaý) eskertildi, – dedi Jambyl oblysynyń PD EQQІB bastyǵy Asqar Jumabekov.
Esterińizge sala ketsek, meıramhanalarda, kafelerde, barlarda jáne basqa da qoǵamdyq mekemelerde kalıan shegýge tyıym salynady.
