«Qorqyt Ata» arnaıy ekonomıkalyq aımaǵy qurylmaq

ASTANA. KAZINFORM – Úkimettiń 2049 jylǵy 31 jeltoqsanǵa deıingi kezeńge «Qorqyt Ata» arnaıy ekonomıkalyq aımaǵyn qurý týraly» qaýlysy ashyq NQA portalynda jarııalandy.

Qaýly Premer-mınıstri Oljas Bektenovtiń Qyzylorda oblysyna jumys sapary qorytyndysy boıynsha bergen tapsyrmalaryn oryndaý maqsatynda, sonymen qatar óńirdiń ekonomıkalyq ósimin qamtamasyz etý jáne ınvestıtsııa tartý úshin ázirlengen.

AEA aýmaǵy 106 gektardy quraıdy jáne Qazaqstan Respýblıkasy aýmaǵynyń ajyramas bóligi sanalady.

«Qorqyt Ata» arnaıy ekonomıkalyq aımaǵyn qurýdyń maqsaty - álemdik standarttarǵa sáıkes keletin zamanaýı ónerkásiptik-óndiristik keshenderdi qurý úshin otandyq jáne sheteldik ınvestorlardy tartý, ekonomıkalyq jáne uıymdastyrýshylyq jaǵdaılardy qalyptastyrý arqyly jeke kásipkerliktiń damýyn yntalandyrý, tranzıttik kóliktik-logıstıkalyq áleýettiń jáne saýda-logıstıkalyq baılanystardyń ósýin yntalandyrý, sondaı-aq týrıstik áleýetti joǵarylatý men tıimdiligi joǵary, básekege qabiletti týrıstik ınfraqurylymdy damytý. Bul óz kezeginde óńirdiń ekonomıkalyq ósýine jáne ınfraqurylymyn jaqsartýǵa yqpal etedi.

Osydan bir jyl buryn Úkimet basshysy Oljas Bektenov arnaıy ekonomıkalyq aımaqtar ınstıtýty áli kúnge deıin tıisti deńgeıde damymaı otyrǵanyn synaǵan. 

Al, ozyq elderdiń kópshiligi arnaıy ekonomıkalyq aımaqtardy ınvestıtsııa tartýdyń tıimdi quralyna aınaldyrǵan.

«Dúnıejúzilik banktiń derekterine súıensek, tartymdylyǵy jaǵynan salyq jáne kedendik jeńildikter tek úshinshi jáne tórtinshi oryndarda tur. Al, birinshi pozıtsııada qolaıly ákimshilendirý jáne qajetti ınfraqurylymmen qamtamasyz etý quraldary ornalasqan. Bizdiń Arnaıy ekonomıkalyq aımaqtardy reformalaý áreketimiz olardyń tıimdiligin arttyra almaı keledi. Sondaı-aq biz basqarýshy kompanııalardy qamtamasyz etýge qomaqty bıýdjet qarajatyn jumsap otyrmyz. Biraq olardyń tarapynan ınvestıtsııa túrinde tıisti qaıtarym joq», - degen edi Oljas Bektenov.