Qorqyp otyrmyz: Aqtóbede múgedektigi bar jáne turmysy tómen otbasylar turatyn úıdiń qabyrǵasy sógildi

Aqtóbe qalasy Eset batyr turǵyn alaby №3 shaǵyn aýdanynyń turǵyndary búgin jınalyp, ákimdik pen qurylys kompanııasynyń ókilderin kútti. Olar túni boıy uıyqtamaı, úreımen tań atyrdy. 

- Alǵashynda «Aqtóbe sáýlet» JShS-niń adamdary kelip, keıbir páterdiń qabyrǵasyndaǵy jaryǵyn bitep ketti. Tipti dala kórinip turǵan. Jel soqqanda kilemin de kótergen eken. Sony aıtqanda bir kúnde jóndedi. Negizi bul 2024 jyldyń qazan aıynda berilgen kópqabatty úı. Áýelden qurylysy durys emes. Ýnıtaz, súlgi keptirgish qubyrlar ózinen-ózi jaryldy. Adamdar ózderi jańartyp jatyr. 10-12 jyl kútken baspanamyzdyń búgingi kúıi qýanyshymyz sý sepkendeı basty. Úreımen otyrmyz. Túnde bir-birimizge habarlasyp, «úıleriń qalaı, uıyqtadyńdar ma» dep suraımyz. Jartysy kóship ketti jaqyndarynyń úıine. Al úıi joq qarapaıym halyq qaıda barady? Men aıyna páter nesıesine 140 myń teńge tóleımin ba, álde 120 myń páterge tóleımin ba? Jaǵdaıym kelmeıdi,- dedi Gúlnash Bazarova.

2024 jyly qoldanysqa berilgen úıge az qamtylǵan otbasylar, múgedektigi bar adamdar, erekshe bala tárbıelep otyrǵan aqtóbelikter men bıýdjettik mekeme qyzmetkerleri qonystanǵan. Olardyń aldy 6 jylǵa, keıingileri 10-15 jylǵa nesıe rásimdegen.

- Jarlas kórshimizben aradaǵy jaryqtan qol alysyp amandasyp otyrmyz. Buǵan 20 kúndeı ýaqyt boldy. Onyń aldynda kóp nárseni elemedik. Jaryqty bitep alamyz dep júre berdik. Biraq kúnnen kúnge ulǵaıyp bara jatyr. Men ekinshi top múgedegimin. Túnimen uıyqtamaı shyqtym, ózim aýyramyn. Endi turǵyndar palatka quryp, sonda jatamyz dep aıtty. Bizge qur ýáde kerek emes. Turǵyndardyń densaýlyǵy, qaýipsizdigi mańyzdy,- dedi Aıgúl Kajenova.

Aqtóbe qalasy qurylys bóliminiń habarlaýynsha, kópqabatty úılerdi «Aqtóbe-Sáýlet» JShS-i saldy. Mamandar úıge baryp, jaǵdaıdy qarap ketken. 

- Merdiger uıymǵa tehnıkalyq qorytyndy daıyndaý úshin saraptama jumystaryn bastaýǵa tapsyrma berildi. Atalǵan saraptama nátıjesine sáıkes anyqtalǵan barlyq aqaýlardy qalpyna keltirý jáne jóndeý jumystaryn qurylys salýshy kompanııa kepildik merzimi aıasynda júrgizedi,- dedi habarlamada.

Al Aqtóbe oblysynyń memlekettik sáýlet qurylys – baqylaý basqarmasy basshysynyń orynbasary Ádilbek Tańkıevniń aıtýynsha, tekseris áli ashylmady.  

- Biz úıdi tolyqtaı qarap shyqtyq. № 39, 40, 41 úılerdiń 7, 8, 9 qabattarynda jaryqtar baıqaldy. Ol boıynsha arnaıy tekserý kerek. Sodan keıin ǵana naqtysyn aıta alamyz. Qaı ýaqytta bastalǵanyn árkim ártúrli aıtyp jatyr. Tolyqtaı zertteımiz ony. Úsh úıdi bir qurylys kompanııasy saldy. 2024 jyly qoldanysqa berilgen. Biz birinshi baqylap, kózben qarap ketemiz. Bul aqaýlar tekserý ashýǵa múmkindik beredi. Zańda oǵan eki apta múmkindik bergen. Sodan keıin tekserý ashylady,- dedi ol.

Eske salsaq, osyǵan deıin Aqtóbede «Nurly jer» baǵdarlamasy aıasynda salynǵan eki kópqabatty úı apatty dep tanyldy.

Keıin is sotqa jetip, merdigerler sottaldy. 

Bıyl apatty eki úı súrildi.