Kórkem júzýden álem kýbogy: Beıjińde jerlesterimiz eki medal jeńip aldy

ASTANA. KAZINFORM – Qytaı astanasy Beıjińde kórkem júzýden álem kýbogynyń alǵashqy kezeńi bastaldy.

Sportty damytý dırektsııasynyń baspasóz qyzmeti málim etkendeı, alǵashqy jarys kúni qazaqstandyq sportshylar 2 medal jeńip aldy. Elimizge sý sporty túrlerinen álem chempıonatynyń alǵashqy altynyn syılaǵan Edýard Kım men Nargıza Bolatova juby (mıkst dýet) búgin tehnıkalyq baǵdarlamada kúmis júldeger atandy.

Osydan keıin toptyq saıysta Qazaqstan quramasy tehnıkalyq baǵdarlamanyń qola júldesine ıe boldy. Karına Magrýpova jekeleı synda (tehnıkalyq baǵdarlama) 8-satyǵa jaıǵasty. Endi erteń erkin baǵdarlamadaǵy jarystar bolady.

Aıta keteıik, bul kezeńde 14 elden kelgen 85 sportshy synǵa túsip jatyr. Olar jarys aıaqtalǵanǵa deıin 11 medal jıyntyǵyn sarapqa salady. Osyǵan deıin Qytaı astanasy sý sporty túrlerinen 35 álemdik jarysty qabyldapty.

Jalpy bıyl álem kýbogynyń 4 kezeńi ótedi. Atletter Beıjińnen keıin Parıjge (3-5 mamyr), Markhemge (31 mamyr – 2 maýsym) at basyn tirep, shildede Býdapeshte (5-7 shildede) sýperfınalda kim myqtyny anyqtaıdy.