Kórkem júzý: Beıjińde qorjynymyz taǵy bir medalmen tolyqty
ASTANA. KAZINFORM – Qytaı astanasy Beıjińde ótip jatqan kórkem júzýden álem kýbogynyń alǵashqy kezeńinde Qazaqstan qorjynyna úshinshi júlde tústi.
Sportty damytý dırektsııasynyń baspasóz qyzmeti málim etkendeı, jekeleı synda erler arasyndaǵy erkin baǵdarlamada Vıktor Drýzın qola júldeger atandy. Ol fınalda 161.5771 ball jınady. Bul 17 jastaǵy qazaqstandyqtyń álem kýbogyndaǵy alǵashqy júldesi ekenin aıta keteıik.
Eske salsaq, Vıktor osyǵan deıin 2021 jyly Reseıdegi álemdik serııa básekesinde mıkst dýet baǵdarlamasynda da 3-oryn ıelengen bolatyn.
Atalǵan synda jastar arasynda álem chempıony Fılıppo Pelatı (Italııa) 174.5979 upaımen top jarsa, Jordı Kaseres Iglesıas (Ispanııa) 163.5543 upaımen kúmiske qol sozdy.
Aıta keteıik, bul kezeńde 14 elden kelgen 85 sportshy synǵa túsip jatyr.
Keshe Edýard Kım men Nargıza Bolatova juby (mıkst dýet) tehnıkalyq baǵdarlamada kúmis júldeger, al toptyq saıysta Qazaqstan quramasy tehnıkalyq baǵdarlamanyń qola júldesine qol jetkizgenin jazǵan bolatynbyz.
