«Kórkem» turǵyn úı kesheninde jaraqattanǵan qurylysshylarǵa ótemaqy tólenýi yqtımal
ASTANA. QazAqparat - Qurylys júrgizýshi kompanııanyń kinási anyqtalsa, «Kórkem» turǵyn úı kesheninde jaraqattanǵan qurylysshylarǵa ótemaqy mindetti túrde tólenetin bolady. Bul týraly «QazAqparat» tilshisine «Aıbyn Qurylys» kompanııasynan habarlady.
«Kimniń kinási bolǵany tergeý jumysynyń barysynda anyqtalady. Eger oqıǵa qurylys júrgizýshi kompanııanyń kesirinen oryn alǵan bolsa, sózsiz jaraqat alǵan qurlysshylarǵa ótemaqy tólenedi. Biraq ol jerde merdiger kompanııanyń qurylysshylary zardap shekken. Olar turǵyn úıdiń qasbetin salý jumystarmen aınalysyp júrgen. Barlyq basshylyq túske deıin nysan aýmaǵynda boldy. Barlyǵy qazir anyqtalyp jatyr», - dep atap ótti kompanııadan.
Eske sala keteıik, búgin Astanada «Kórkem» turǵyn úı kesheninde metall qurylymdarynyń bólikteri qulap ketip , 18 adam jaraqat alǵan bolatyn.
