Kórkem gımnastıkadan Azııa chempıonaty qazaqstandyq qyzdardyń jeńisimen aıaqtaldy
ASTANA. 18 maýsym. QazAqparat - Astanada ótken kórkem gımnastıkadan Azııa chempıonaty qazaqstandyq qyzdardyń jeńisimen aıaqtaldy, dep habarlady elordalyq sport basqarmasynan.
Symbattylar jarysynyń sońǵy fınaldyq baıqaýy juma, 17 maýsym kúni aıaqtaldy.
Alǵashqy jeńimpazdar toptyq jattyǵýlarda anyqtaldy. «2 sheńber+3 lenta» toptyq jattyǵýynda kúrdeli baǵdarlama kórsete alǵan Qytaı qyzdary altynnan alqa taqsa, qazaqstandyq sportshylar «kúmis» júldeni enshiledi. Al japondyq qyzdar «qolany» qanaǵat tutty.
Toptyq jattyǵýdan keıin kórermender men tóreshilerdiń aldyna jasóspirimder shyqty, olar býlava jáne lenta jattyǵýlary boıynsha medaldardy sarapqa saldy. Esterińizge sala keteıik, osynyń aldynda jeke baǵdarlama boıynsha jasóspirimder arasynda kópsaıystan elordalyq Álııa Asymova chempıon atanǵan edi. Al qorytyndy fınaldyq jarysta da 14 jasar Álııa jaqsy óner kórsetti. Býlava jattyǵýynda ózbekstandyq Valerııa Davydovaǵa nebári 0,1 ball ese jiberip alǵan Álııa, 26 upaımen ekinshi orynǵa taban tiredi. Úshinshi oryn - qytaılyq Vang Zııdiki.
Al lenta jattyǵýynda Álııa Asymova Azııa chempıony atandy. Ekinshi orynda - malaızııalyq Vong Po San, úshinshi orynda ózbekstandyq - Valerııa Davydova.
Bul kúni sondaı-aq eresekter arasynda aqtyq saıystar ótti. Osynyń aldynda ǵana kópsaıysta chempıon atanǵan qazaqstandyq Anna Alıabeva sheńbermen bolǵan jarysta birinshi oryn jeńip aldy. Jattyǵýdyń bul túrinde ekinshi oryndy - qytaılyq Deng Senıý, úshinshi oryndy ózbekstandyq Ýlıana Trofımova ıelendi.
Dop jattyǵýynda birinshi oryndy Anna Alıabeva, ekinshi oryndy qytaılyq Deng Senıý aldy. Al úshinshi oryn - japonııalyq ıAmagýchı Rýnaǵa buıyrdy.
Azııanyń absolıýttik chempıondyǵyna jaqyn bolǵan Anna Alıabeva býlava jattyǵýynda qatelik jiberip alyp, qolany qanaǵat tutty. Esesine bul jattyǵýda qazaqstandyq sportshy Marına Petrakova eń joǵary upaı - 27,45 ball jınap, altynnan alqa taqty. Ekinshi oryn - 26,15 ball jınaǵan ózbekstandyq sportshy Jámılá Rahmatovanyń enshisine buıyrdy.
Baǵdarlamanyń qorytyndy jáne eń tartymdy túri - lenta jattyǵýynyń da altyny bizdiń qyzdarymyzǵa buıyrdy. Anna Alıabeva bul joly negizgi qarsylastarynyń biri - ózbekstandyq Ýlıana Trofımovadan ozyp, 28,8 balmen Azııa chempıonatyndaǵy tórtinshi «altyndy» jeńip aldy. Al Marına Petrakova jattyǵýdyń bul túrinde «qola» medal ıelendi.
Sóıtip, Qazaqstan quramasy sporttyń osy túri boıynsha Azııa chempıony ekendikterin dáleldedi.
