Kórkem gımnastıkadan «Aphrodite Cup» týrnıri: elordalyq sportshylar Afınada top jardy
ASTANA. KAZINFORM – Grekııanyń Afına qalasynda kórkem gımnastıkadan «Aphrodite Cup» halyqaralyq týrnıri ótti. Atalǵan jarysta Qazaqstan quramasynyń sportshylary joǵary nátıje kórsetip, el namysyn halyqaralyq arenada abyroımen qorǵady. Olardyń qatarynda Astana qalasynyń sportshylary da jeńis tuǵyrynan kórindi, dep habarlaıdy elorda ákimdiginiń resmı saıty.
Eresekter arasynda jekeleı baǵdarlamada kópsaıys qorytyndysy boıynsha elordalyq Aqmaral Erekesheva altyn medal jeńip alyp, týrnır jeńimpazy atandy. Fınalda ol doppen oryndalǵan jattyǵýda ekinshi oryn (25,800) jáne býlavamen oryndalǵan jattyǵýda birinshi oryn (28,450) aldy. Taǵy bir sportshymyz Aıym Meıirjanova lentamen oryndalǵan jattyǵýda (26,250) qola júldege qol jetkizdi.
Jasóspirimder arasynda jekeleı baǵdarlamada kópsaıys qorytyndysy boıynsha Astana qalasynyń sportshylary Anna Rýbtsova kúmis medal ıelense, Aıǵanym Rysbek pen Anel Dınısheva qola júldeger atandy.
Fınaldyq jattyǵýlarda Aıǵanym Rysbek joǵary nátıje kórsetip, shyǵyrshyqpen oryndalǵan jattyǵýda altyn medal (25,850), sondaı-aq doppen (25,850) jáne lentamen (25,200) oryndalǵan jattyǵýlarda kúmis medal jeńip aldy.
Jasóspirimder arasyndaǵy toptyq jattyǵýlarda Qazaqstan quramasy kópsaıys qorytyndysy boıynsha 43,55 upaı jınap, birinshi oryn ıelendi. Fınalda komanda 5 doppen oryndalǵan jattyǵýda altyn medal (22,150) jáne 5 lentamen oryndalǵan jattyǵýda kúmis medal (17,700) jeńip aldy.
Eresekter arasyndaǵy toptyq jattyǵýlarda da Qazaqstan quramasy 48,75 upaı jınap, kópsaıysta birinshi oryn aldy.
5 doppen oryndalǵan fınaldyq jattyǵýda komanda altyn medal (23,650) ıelendi.
«Aphrodite Cup» týrnırindegi Qazaqstan quramasynyń jalpy nátıjesi:
• Altyn – 7 medal;
• kúmis – 5 medal;
• qola – 3 medal.
Sportshylardy Astana qalasy ákimdiginiń №1 balalar men jasóspirimderdiń mamandandyrylǵan olımpıadalyq rezerv sport mektebiniń qyzmetkerleri, atap aıtqanda, aǵa jattyqtyrýshy Merýert Balǵynbaeva, jattyqtyrýshylar Elena Fotına men Oksana Nechıtaılo, horeograftar Saıa Aıdys, Shyńǵys Ospanbaev jáne Karına Ablakova daıyndady.
Buǵan deıin sporttyq gımnastıkadan Qazaqstan quramasy álem kýbogyn bir medalmen aıaqtaǵanyn jazǵan edik.
