Kórkem gımnastıkadan álem chempıonatyna baratyn qazaqstandyq sportshylar anyqtaldy
ASTANA. QazAqparat - Ispanııanyń Valensııa qalasynda 23-27 tamyz aralyǵynda kórkem gımnastıkadan álem chempıonaty ótedi, dep habarlaıdy QazAqparat tilshisi.
MSM Sport jáne dene shynyqtyrý isteri komıteti Sportty damytý dırektsııasynyń baspasóz qyzmetiniń habarlaýynsha, onda 2024 jylǵy Parıj Olımpıadasynyń jekeleı syndaǵy 14, al toptyq básekedegi 5 joldamasy sarapqa salynady.
Dúbirli dodada elimizdiń atynan jekeleı synda Eljana Tanıeva men Erıka Jaılaýova óner kórsetedi.
Al toptyq jattyǵýda Arýjan Qasenova, Aıdana Shaıahmetova, Baıan Qoıbaǵar, Arýjan Qalsaeva, Aqsuńqar Ábdirahman men Aıaýlym Qadyr baq synaıdy.
El quramasynda Eljana Tanıeva – tájirıbeli sportshylardyń biri. 2005 jyldyń 5 qyrkúıeginde dúnıege kelgen ol Azııa chempıonatynda 2022 jyly jeńimpaz atansa, birneshe márte júldegerler qatarynan kórindi. 2021 jylǵy Jazǵy ýnıversıadada kúmis jáne qola júlde aldy.
Sondaı-aq Bolgarııa astanasy Sofııa qalasynda kórkem gımnastıkadan ótken álem kýbogi kezeńiniń kúmis júldegeri atandy.
Álem chempıonaty 1963 jyldan beri turaqty túrde ótkizilip keledi.
Qazirge deıin medaldar kestesinde Reseı 205 júldemen (113 altyn, 57 kúmis, 35 qola) kósh bastap tur. Odan keıingi oryndarda Bolgarııa, Ýkraına quramalary bar.
