Kórkem gımnastıka: Olımpıada chempıony Margarıta Mamýn Almatyǵa keldi
ALMATY. QazAqparat - Búgin «Dostyq» sport kesheninde kórkem gımnastıkadan «Kerbez Cup» ashyq halyqaralyq chempıonatynyń fınaly ótti, dep habarlaıdy Qazaqparat tilshisi.
Baıraqty básekede Qazaqstan, Reseı, Ózbekstan, Qytaı jáne Qyrǵyzstan elderinen kelgen sportshylar baq synady.
Qyrǵyzstannan kelgen gımnastshynyń aıtýynsha, barlyq quraldarmen birdeı jaqsy óner kórsetý múmkin emes. Kóbinese, lentamen jumys isteý qıyn. Óıtkeni, ol árdaıym qozǵalysta bolý kerek jáne jerge tımeýi tıis, mundaı qatelikter úshin tóreshiler baǵany tómendetedi.
«Men Almatydaǵy jarystarǵa jıi kelip turamyn. Osynda óner kórsetkende múlde qobaljymaımyn, ózimniń týǵan qalamdaı bolyp ketken. Buǵan deıin, Almatyda ótken jarysta jeńimpaz atanǵanmyn. Búgin de jaqsy óner kórsettim. Biraq, maǵan lentamen óner kórsetý qıyn boldy. Onymen jumys isteý ońaı emes», - dedi jarys qatysýshysy Aıǵanysh Qurmanbekova.
Gımnastshylardyń basym bóligi sheńberdi eń jeńil kórkem gımnastıka quraly dep atady. Óıtkeni, gımnastıkaǵa alǵash kelgende meńgeretin jabdyq sheńber bolyp tabylady. Al tóreshiler óz kezeginde sportshy qyzdardyń sheberligin, qıyn ádisterdiń durys oryndalýyn, texnıkasyn baǵalady.
Chempıonattyń saltanatty jabylý rásimine Olımpıada chempıony Margarıta Mamýn jáne elimizdiń eńbegi sińgen sport sheberi Álııa ıÝsýpova qatysty. Olar jarys fınalısteriniń ónerin tamashalap, gımnastshylardy marapattady.
«Men alǵash ret Almatyǵa kelip otyrmyn, qonaqjaılylyqtaryńyz úshin alǵysymdy bildiremin. Eń bastysy shydamdy bolyńyzdar. Ózderińizge senip, eńbek etseńizder, sonda barlyǵy bolady. Al ata-analarǵa aıtarym, sizder balalaryńyzdyń basty jankúıeri retinde olarǵa qoldaý kórsetińizder», - dedi Olımpıada chempıony Margarıta Mamýn tilek bildirdi.
Chempıonat nátıjesinde 2001-2015 jyldary týylǵan sportshylar arasynda úzdikter anyqtaldy. Jeńimpazdar men júldegerler medal, dıplom, baǵaly syılyqtarmen jáne demeýshiler atynan 100 myń teńge kólemindegi sertıfıkattarmen marapattaldy.
