Kórkem gımnastıka: Astanalyqtar 7 altyn medal jeńip aldy
ASTANA. KAZINFORM – Majarstan astanasy Býdapeshte ótken kórkem gımnastıkadan 28-shi Gracia Fair Cup halyqaralyq týrnırinde Astana qalasynyń kórkem gımnastıka quramasy baǵdarlamanyń barlyq túrinen joǵary deńgeıde óner kórsetip, 7 altyn medal jeńip aldy.
Astana qalalyq sport basqarmasy málim etkendeı, aıtýly týrnırdiń komandalyq saıysynda (jekelegen baǵdarlama) Astanalyq «Sozvezdıe» komandasy altynnan alqa taqty. Komanda quramynda Erkejan Saǵat, Adııa Amantaeva, Radysh Ekaterına, Inkar Satemırova, Aıaýlym Janıbek, Aıaýlym Sýltanbaeva óner kórsetti.
Jekeleı synda óner kórsetken elordalyq burymdy gımnasshylar úzdikter qatarynan kórindi. Atap aıtqanda, Aıbota Ertaıqyzy doppen, lentamen jáne urshyqpen óner kórsetýde des bermeı, 3 jattyǵýda altynnan alqa taqsa, Erıka Jaılaýova shyǵyrshyq jattyǵýynda chempıon atandy. Al Aqmaral Erekeshova 4 birdeı jattyǵý boıynsha júldege ilikti. Ol jekeleı synda doppen jáne taspamen altyn medal enshilese, shyǵyrshyq pen urshyq jattyǵýynda kúmis júldeger atandy.
Kúni keshe ótken kópsaıysta jerlesterimiz Aıbota Ertaıqyzy men Aqmaral Erekeshova kúmis, Erıka Jaılaýova men Darııa Kýsherbaeva qola júldegerleri atandy.
Osylaısha Astana qalasynyń burymdy gımnasshylar baıraqty básekede el qorjynyna 7 altyn, 4 kúmis jáne 2 qola medal saldy.
