Kórkem aýdarmaǵa kóńil bólinbegendikten qazaq ádebıeti álemge tanylmaı otyr - A. Smaıyl
Depýtat Aldan Smaıyldyń aıtýynsha, qazaq ádebıeti baı ádebıet bolǵanymen, ol álemge erkin tanylmaı otyr. «Shyǵarmalary halyqaralyq bedeldi tilderge aýdarylǵan qazaq qalamgerleri saýsaqpen sanarlyq. Onyń ózinde, sol týyndylardyń aýdarmasy tamasha dep eshkim aıta almaıdy. Óıtkeni, bizde aǵylshyn, ıspan, frantsýz, nemis, qytaı sekildi ótimdi tilderde kórkem aýdarma jasaıtyn kásibı aýdarmashylar bolǵan emes jáne qazir de joq. Olardy daıarlaýǵa yntaly bolyp otyrǵan memlekettik qurylymdardy da taba almaısyz», - deıdi depýtat.
Sonymen qatar, halyq qalaýlysy Eýrazııa ulttyq ýnıversıteti nemese ál-Farabı atyndaǵy Qazaq ulttyq ýnıversıtetindegi fılologııa fakýltetterinen kórkem aýdarma bólimin ashý týraly usynys buǵan deıin kóterilgenin, alaıda ondaı sheshim áli qabyldanbaı otyrǵanyn aıtyp, qynjylys bildirdi.
«Mundaǵy basty kinárat ádebıetke, ulttyq rýhanı qundylyqtaryna, halyqtyń abyroı-bedeline janashyrlyqpen qaraı bilmeýde. Munaı men temir kimde joq, talaılarda bar. Al Pýshkın men Abaı, Balzak pen Áýezov, Shekspır men Mahambet biren-saran ulttyń ǵana enshisinde», - degen depýtat máseleni túrli syltaýmen soza berýge bolmaıtynyn alǵa tartady.
Osyǵan oraı, A. Smaıyl Eýrazııa ulttyq ýnıversıtetiniń fılologııa fakýltetinen kórkem aýdarma bólimin, sondaı-aq Qazaqstannyń sheteldegi elshilikteri janynan «Qazaq ádebıeti» kitaphanasyn ashý máselesin kóterdi. «Elshilikter janyndaǵy ondaı kitaphanalarǵa búginge deıin shet tilinen aýdarylǵan kórkem jáne ǵylymı-kópshilik, tarıhı ádebıetter jınaqtalsa, aqyn-jazýshylardyń keshteri men túrli taqyryptaǵy konferentsııalar ótip tursa, qazaq rýhanııaty syrt memleketterde rýhanı shańyraqqa aınalar edi. Qazaq ádebıetine kóptegen elderdiń nazaryn aýdarar edik», - dedi A. Smaıyl.