Kórkem ádebıettiń barlyǵyn halyqtyń armany, táýelsizdigi turǵysynan qaraýǵa tıispiz - Serik Qırabaev
ALMATY. 27 qyrkúıek. QazAqparat /Erlik Erjanuly/ - Qazaq ádebıetiniń arǵy-bergi tarıhyn qarap otyrsaq ómiri úzilmeıtin, bir zamannan bir zamanǵa aýysyp jańaryp otyratyn úlken ulttyq ıdeıa bar ekenin kóremiz.
QR UǴA akademıgi, fılologııa ǵylymynyń doktory Serik Qırabaev búgin Almatyda ótip jatqan "Qazirgi ádebıettaný, ónertaný jáne folklortanýdyń ózekti máseleleri" dep atalatyn halyqaralyq ǵylymı-teorııalyq konferentsııada osyndaı pikir bildirdi.
"Biz qazir qandaı shyǵarma bolsyn jańa traktovkamen qaraýymyz kerek. Ádebıet degen nárse máńgilik bolǵanda árqashan qaıta oqýdy, qaıta qaraýdy qajet etedi. Ony óz zamanynyń turǵysynan taldaý kerek. Olardyń barlyǵyn halyqtyń armany, táýelsizdigi turǵysynan qaraýǵa tıispiz", - deıdi Serik Smaıyluly.
M. Áýezov atyndaǵy Ádebıet jáne óner ınstıtýtynyń táýelsizdik dáýirdegi ádebıet bóliminiń bas ǵylym qyzmetkeriniń aıtýynsha, kórkem ádebıettiń máńgiliginiń ǵylymı máni bar. Ádebıet degen dúnıeden óz zamanynyń shyndyǵyn kórsetetin, adamdaryn, qaıratkerlerin tanytatyn, halyqtyń arman-muńyn jyrlaǵan zamannyń aınasy ekenin aıqyn tanımyz. Ǵalym Serik Qırabaevtyń sózine qaraǵanda, qazir Sábıt Muqanovtyń "Botakózin" revolıýtsııany jyrlaǵan romandardyń qataryna qosyp, durys uǵyna almaı júrgender bar. "Shyn mazmunyna úńilip kóreıikshi onda revolıýtsııa qarsańyndaǵy qanaýda, ezgide jatqan qazaqtyń turmys-tirshiligin, bostandyqqa umtylý jolyn kórsetedi",- dedi ol.
