Kórkem ádebıetti basyp shyǵaratyndarǵa qoldaý kórsetiledi - Ashat Aımaǵambetov

Kórkem ádebıetti basyp shyǵarýmen aınalysatyn baspalardyń jumysyna qoldaý jasalady. Bul týraly búgin Parlament Májilisinde qazaq tilindegi kórkem ádebıettiń baspa ındýstrııasyn damytý taqyrybyndaǵy jıynda palata depýtaty Ashat Aımaǵambetov aıtty, dep habarlaıdy Kazinform.

«Depýtattar osy baǵyt boıynsha bastama jasaǵan edi. Onyń aıasynda arnaıy zań jobasy daıyndalyp, soǵan birqatar túzetý engizilip, qujat Úkimettiń qorytyndysyn alýǵa joldandy. Bul zań jobasy 2 apta ishinde Parlamentke engizilgennen keıin, bizde jumys toby qurylady», - dedi A. Aımaǵambetov.

Onyń aıtýynsha, avtorlyq quqyq boıynsha usynystar da atalǵan zań jobasynda eskeriledi.

«Saladaǵy salyq boıynsha jeńildikterdi qarastyramyz. Bul óz kezeginde memlekettiń kirisine aıtarlyqtaı nuqsan keltirmeıdi dep sanaımyz. Salyq jeńildikteri naqty osy sektordy qoldaýǵa tıimdi qadam bolmaq. Ekinshiden, sýbsıdııa berý máselesi de mańyzdy. Biraq sýbsıdııany tıimdi tásildermen iske asyrýymyz kerek. Qoldaýdy qajet etetin baspalarǵa nemese avtorlarǵa berýdi qarastyrǵan jón. Sondyqtan sýbsıdııany egjeı-tegjeıli talqylaımyz», - dedi depýtat.

Budan buryn habarlanǵandaı, Májilis depýtaty Juldyz Súleımenova kitap basý salasyndaǵy sýbsıdııa máselesin de pysyqtaý kerek ekenin aıtty.

Halyqaralyq «Qazaq tili» qoǵamdyq birlestiginiń prezıdenti Raýan Kenjehanuly memlekettik kitaphanalardyń qoryn bir jerden tsıfrlandyrýdy usyndy.