Qorytyndy baǵa berýge áli erte — halyqaralyq baıqaýshy
ASTANA. KAZINFORM — Halyqaralyq baıqaýshy Basel Ál-Hadj Djasem Qazaqstanda bir palataly Quryltaı depýtattaryn saılaý barysynda saılaý protsesiniń ashyqtyǵy men jarııalylyǵyn atap ótti.
Saıası sholýshy, halyqaralyq qatynastar jáne Taıaý Shyǵys saıasaty salasynyń mamany Basel Ál-Hadj Djasem búgin Astanadaǵy birneshe saılaý ýchaskesine baryp, daýys berý barysyn baqylady.
— Biz búgin halyqaralyq baıqaýshylar retinde saılaý barysyn jáne zań talaptarynyń saqtalýyn baǵalaý úshin keldik. Bul saılaýdyń Qazaqstan úshin mańyzy erekshe. Alǵash ret bir palataly Parlament saılaýy ótip jatyr. Bul Qazaqstandaǵy konstıtýtsııalyq jáne saıası reformalar aıasyndaǵy jańǵyrýdyń mańyzdy kezeńi, — dedi ol.
Halyqaralyq baıqaýshynyń aıtýynsha, Qazaqstannyń mańyzy geografııalyq shekarasynan áldeqaıda keń.
— Qazaqstan Ortalyq Azııa elderiniń arasynda úlken mańyzǵa ıe. Qazaqstannyń Reseı, Qytaı jáne Eýropanyń múddeleri toǵysatyn jerde ornalasqanyn barlyǵy biledi. Qazaqstannyń turaqtylyǵy tek Qazaqstannyń ózi úshin ǵana emes, búkil óńir úshin mańyzdy, — dep atap ótti Basel Ál-Hadj Djasem.
Ol saılaý ýchaskelerine barǵannan keıingi áserimen de bólisti.
— Saılaý ýchaskelerinde kórgenimiz protsestiń ashyq ári jarııa túrde ótip jatqanyn kórsetedi. Baıqaýshylarǵa saılaý barysyna qol jetkizý múmkindigi qamtamasyz etilgen. Sondaı-aq daýys berýge kelgen azamattarmen de ashyq jumys isteýge múmkindik bar, — dedi halyqaralyq baıqaýshy.
Sonymen qatar Basel Ál-Hadj Djasem saılaý protsesine ázirge túpkilikti baǵa berýge erte ekenin atap ótti.
— Jalpy jáne túpkilikti baǵa berýge áli erte. Búkil saılaý protsesiniń aıaqtalýyn daýys berýdi, daýystardy sanaýdy jáne saılaý nátıjeleriniń jarııalanýyn kútý qajet, — dep qorytyndylady ol.
Aıta keteıik, buǵan deıin AQSh sarapshysy Qazaqstannyń damýy úshin saıası turaqtylyq basty shart dep ataǵanyn jazǵanbyz.
