Kórisý merekesiniń mán-mańyzyn keıingi urpaqqa uǵyndyra bilýimiz qajet – Maqsot Bergen

-Maqsot Qabyshuly, Kórisýdi Amal merekesi dep te ataıdy. Qazaqstannyń batys óńiri men Reseıdiń shekaralas aımaqtaryndaǵy qazaqtardyń arasynda saqtalǵan ejelgi dástúr. Osy jóninde ne aıtar edińiz?
-Iá, 14 naýryz – Kórisý meıramy. Kórisý kúninde qazaq halqy qystan aman-esen shyqqanyna qýanyp, bir-birimen qol alysady. Tań atar-atpastan Kórisý merekesin asyǵa kútip otyrǵan árbir otbasy aldyn ala daıyndalyp qoıǵan dastarhanyn jaıady. Mindetti túrde baýyrsaq pisirip, dastarhanǵa tátti taǵamdardy úıip qoıady. Otbasynyń kishileri úlkenderine qos qolyn berip, kórisip shyǵady. Tań ata aýyldyń jasy kishileri túgel úı-úıdi aralap, sálem berip shyǵady.
Aýyldyń úlkenderi jastarǵa mindetti túrde bata beredi.
-Halqymyzda «Batamenen el kógerer, Jańbyrmenen jer kógerer» degen qanatty sóz bar. Batanyń da mán-mańyzy erekshe ǵoı?
-Oǵan sóz bar ma! Qazaq halqynyń ulttyq mádenı ıgilikteriniń ishinde, eldiń rýhanı qazynasynda bata sózderiniń mán maǵynasy, qadir-qasıeti aıryqsha baǵaly. Óıtkeni qanymyzǵa sińisti, janymyzǵa juǵymdy, oı sanamyzǵa nurly shýaq syılap, silkindirip, serpiltetin, marqaıtyp qanaǵattandyratyn osynaý aqyl, naqyl sózder – tárbıeniń bastaý bulaǵy.
Halqymyzdyń tilek, bata sózderi jetkinshek jas urpaqty ádepti, sabyrly, zerdeli, arly bolyp ósýge baýlıdy, kekshil emes, keshirimdi bolýyn tileıdi, jerin, elin qorǵaý úshin talapty da erjúrek bolyp erjetýine talpyntady.
Bala kezimizde aýyldyq jerde aýyldaǵy úılerdi túgelge jýyq aralap, sálem berip shyǵatynbyz, bata alatynbyz. Jasyratyn joq, balalarǵa tátti kámpıt beretin. Osynyń ózi erekshe qýanysh syılaıtyn.
Saýlyqtyń basy sálemmen bastalady. Jastarymyzdy elimizdiń salt-dástúrin saqtap, 14 naýryz meıramy kúni úlkenderge sálem berýdi umytpaýǵa shaqyramyn.
-Kórisý meıramy sońǵy jyldary elimizde keńinen tarala bastady. Qazirgi kezde Batys óńir ǵana emes, Qazaqstannyń basqa da aımaqtarynyń turǵyndary bul merekeden habardar. Onyń aıasyn keńeıte túsý úshin áli de qandaı is-sharalar atqarý qajet dep oılaısyz?
-Bir-birimizben syılastyqqa jetelep, jaqsylyq ataýlyǵa úndeıtin mundaı mereke barsha qazaqqa ortaq bolsa, artyq etpeıdi dep oılaımyn. Osy oraıda jyl saıyn Kórisý kúnine oraı tárbıelik máni bar túrli is-sharalardy uıymdastyra bersek, odan utylmaımyz. Mysaly, bizder, ardagerler mereke qarsańynda Hamza Esenjanov atyndaǵy oblystyq balalar men jasóspirimder kitaphanasynda jas jetkinshekterge Kórisý kúni týraly aıtyp, óz ónerlerimizdi kórsettik, batamyzdy berdik. Basqa da is-sharalardy ótkizýdemiz. Mine, osylaısha Kórisý kúniniń mán-mańyzyn keıingi jastarǵa jetkize túspekshimiz.
-Áńgimeńizge rahmet!