Kórisý merekesinde úlkenderdi telefonmen, vıdeoqońyraýmen quttyqtaǵan jón – Atyraý oblysynyń bas sanıtar dárigeri
ATYRAÝ. QazAqparat – Kórisý merekesinde úlkenderdi telefonmen, vıdeoqońyraýmen quttyqtaǵan jón. Atyraý oblysynyń bas sanıtar dárigeri Mádenıet Tanaýov turǵyndarǵa osyndaı usynys jasady, dep habarlaıdy QazAqparat.
«Atyraý oblysynda epıdemıologııalyq ahýal áli turaqtalǵan joq. Osyǵan oraı,turǵyndar áleýmettik araqashyqtyqty, medıtsınalyq maska taǵý rejımin saqtaýy qajet.
Adamdar kóp jınalatyn jerge barmaý kerek. Ásirese, erteń, 14 naýryzda bastalatyn Kórisý merekesinde jasy úlken adamdardy telefonmen, vıdeoqońyraý shalý arqyly quttyqtaǵan jón. Óıtkeni, jasy úlken qarııalar qaýipti vırýs juqtyrý múmkindigi basym topqa jatady. Ondaı adamdardyń kópshiliginde sozylmaly syrqaty bolýy múmkin. Sondyqtan, saqtyq sharalaryn saqtaǵanda ǵana qaýipti vırýstyń taralýyna tosqaýyl qoıýǵa bolady» - deıdi bas sanıtar dáriger Mádenıet Tanaýov.
Onyń aıtýynsha, óńir turǵyndary arasynda koronavırýs ınfektsııasynyń tirkelýi toqtaǵan joq. Sol sebepten, árkim aldymen óziniń, aǵaıyn-týysynyń saýlyǵyn oılaǵany jón.
«Árıne, ejelden kele jatqan Kórisý merekesinde úlkenderdi syılaý, olarǵa qurmet kórsetý sekildi qundylyqtardy joǵaltpaýymyz qajet-aq. Alaıda, ár áýlettegi syıly qarııalardyń aman júrgenin qalaıtyn bolsaq, bul joly olarǵa arnaıy baryp, qol berip kórisýdi ázirge qoıa turǵannyń sókettigi joq. Jasy úlken adamdar telefonmen, vıdeoqońyraýmen quttyqtaǵandy túsinispikpen qabyldaıdy dep oılaımyn. Qazirgi epıdemıologııalyq ahýal bizdi osyndaı qadamǵa barýǵa májbúr etip otyr», -dedi Mádenıet Tanaýov.
Eske sala ketelik, budan buryn Atyraý oblysynda 662 bala koronavırýs juqtyrǵanyn habarlaǵan edik.
