Kórisý kúniniń balalar úshin tárbıelik máni erekshe – Nurjan Tólepov
ORAL. QazAqparat – 14 naýryz Qazaqstannyń batys óńirlerinde, sondaı-aq Reseıdiń shekaralas aımaqtarynda Kórisý kúni retinde atalyp ótiledi. Osyǵan oraı Jáńgir han atyndaǵy tarıhı-etnografııalyq mýzeıiniń meńgerýshisi, «Úzdik ólketanýshy» tósbelgisiniń ıegeri Nurjan Tólepov óz oı-tolǵamymen bólisti, dep habarlaıdy QazAqparat tilshisi.
Onyń aıtýynsha, Kórisý – qazaqtyń ejelden kele jatqan saltynyń biri.
Qystaı úılerinen shyqpaǵan qazaqtar kóktem shyǵa bir-birimen amandasyp, qushaqtasa kórisken. Bul – ásirese, jasy úlkenderdi syılaýdyń erekshe bir kórinisi.
-Biz kishkentaıymyzdan osy kúndi asyǵa kútetin edik. Erteń Kórisý kúni, uıyqtap qalmaý kerek, oıatyńdar dep aldymyzǵa kádimgideı maqsat qoıyp, daıyndalatynbyz. Áli esimde, ótken ǵasyrdyń alpysynshy jyldary bul kúndi aıryqsha qarsy alatynbyz. Qazir oılap qarasam, balalar úshin aıtarlyqtaı meıram edi. Sebebi qushaq jaıyp, jasy úlken ata-ájeler sálemimizge batasyn berip, aldymyzǵa baryn tosatyn. Qolymyz ýys-ýys baýyrsaqqa, qaltamyz táttige tolatyn, - deıdi Nurjan Joldyǵalıuly.
Onyń sózine qaraǵanda, aldymen áýlettiń úlkeni ákesiniń aǵasyna baryp, kórisedi eken. Ózi mama dep ataıtyn ájesi de sol úıde. Ájesiniń meıirimine bólenip, erkelep, qasynda kóbirek bolady. Netken ystyq sátter! Degenmen bir tyǵyz sharýa qalyp qoıǵandaı, salmaqty sóılep, ózinshe eseıip qalady. Rasynda jaýapkershilikti sezinetin bolyp tur ǵoı. Ózderin qamshylap, júıtkip júrip, túske deıin aǵaıyn-týma, kórshilerdi aralap shyǵady. Ýaqytynda aralap úlgermese, ókinishte qalatyndaı kórinetin.
«Úıge kirgende, úlken is tyńdyrǵandaı, kiresiń ǵoı. Otbasy jınalǵan dastarhan basynda gý-gý áńgime. Kórgendi, estigendi aıtasyń. Ata-anań da qoldap, maqtaǵan saıyn qanattanasyń. Sóıtip kórisý kún de ótedi, kelesi jylǵa jospar quryp jatqanda uıyqtap ketesin. Biraq esimde qalǵany naýryz, naýryz kóje dep aıtylmaıtyn edi. Bar biletinimiz, baıaǵy naýryz aıynyń on tórti – Kórisý kúni! Eń bastysy, bul kúnniń balalar úshin tárbıelik máni erekshe ekendigin osydan-aq kórýge bolady. Solaı úzilgendi jalǵap, tól merekemizdi toılaýǵa da jettik qoı. Birtutas elmiz, sondyqtan shyǵys, batysqa bólinbeı, bir arnaǵa toǵysqan tarıhymyz ben salt-dástúrimiz qaıta túleı berýi kerek. Kórisý kúni – barshamyzǵa ortaq kún, ortaq mereke deýge bolady», dep túıindedi oıyn N.Tólepov.
