Kórisý kúninde aýyl jastary 102 jastaǵy ájeniń batasyn aldy
ORAL. QazAqparat - Búgin Kórisý merekesine oraı Qaztalov aýdany Taldyqudyq aýylynyń jastary 102 jastaǵy Maftýha Aıtqalıevaǵa baryp kórisip, aq batasyn aldy, dep habarlaıdy «QazAqparat» HAA tilshisi.
Aýdannyń eń qart turǵyny sanalatyn ájeı jastarǵa «Jasyń qutty bolsyn!» aıtyp, rızashylyǵyn bildirip, óziniń ómir jolyn áńgimelep berdi. Qarapaıym otbasynda dúnıege kelip, bastaýysh mektepte oqyp, saýatyn ashqan ol kórshiles Jańaqala aýdanyndaǵy Boryq eldi mekeninde dúkenshi bolady. Taras Aıtqalıevke turmysqa shyqqan Maftýha ómirde qıyndyqty az kórgen joq. Ásirese, arqa súıer eriniń qazasy aýyr tıedi. Uly Otan soǵysy bastalyp, maıdanǵa attanǵan aǵa leıtenant Taras Aıtqalıev 1943 jyly Stalıngrad qalasynda erlikpen qaza tapty. Basyna túsken aýyrtpalyqqa qaramastan, shańyraqtyń otyn sóndirmeı, balalaryn ósirdi. Uly Erlan kóp jyl dáriger bolyp, elge qyzmet etti. Qazir ol joq bolǵanymen, ózin baǵyp-qaǵyp otyrǵan kelini Altyn bar. Búginde jıenderi men jıensharlarynyń ortasynda baqytty ǵumyr keshýde.
Ǵasyr jasaǵan ájeı áli tyń, sanasy sergek, kitaphanadan kitap aldyryp oqıdy. Ol - aýyl kitaphanasynyń eń baıyrǵy oqyrmany.
«Qıyndyqty biz kórsek te, keıingi urpaq baqytty bolsyn. Táýelsiz elimiz odan saıyn órkendeı bersin. Ulystyń uly kúni qutty bolyp, keń baıtaq Qazaqstanǵa yrys-bereke ákelsin!», dedi Maftýha Aıtqalıeva.
Aıta keteıik, búgin Kórisý kúnine oraı óńirde merekelik sharalar uıymdastyryldy. Mysaly, Oral qalalyq mádenıet jáne tilderdi damytý bólimi oblystyq jastarmen jumys jónindegi resýrstyq ortalyqpen birlese otyryp, «Kórisip, batasyn al aqsaqaldyń» atty sharasyn ótkizdi. Onda jastar soǵys jáne eńbek ardagerleri, elge syıly adamdardyń úılerine baryp, meırammen quttyqtady. A.Ostrovskıı atyndaǵy oblystyq orys drama teatry aldynda arnaıy kontsert qoıyldy. Avtobýstarda dybys kúsheıtkishter arqyly aq tilekter aıtylyp, ánder shyrqaldy. Osyndaı sharalar oblys aýdandarynda da jalǵasyn tapty.
