Kórisý kúni: Óner ıeleri qarttar men balalardy kontsertpen qýantady

NUR-SULTAN. QazAqparat - Naýryz merekesiniń bastaýy – Kórisý kúnine oraı «Roza Baǵlanova atyndaǵy «Qazaqkontsert» uıymy qaıyrymdylyq is-sharalaryn ótkizedi, dep habarlaıdy QazAqparat.

Qazaqkontserttiń baspasóz qyzmetinen málim etkendeı, bıylǵy Kórisý kúnindegi is-sharalar qarttar men balalarǵa arnalady.

Atap aıtqanda, 14 naýryz kúni saǵat 11:00-de Qazaqkontsert quramyndaǵy «Astana Musical» memlekettik teatry elordadaǵy «Sharapat» qarttar úıinde óner kórsetedi. Teatr ártisteri qarııalardy «Sıqyrly sazdy hor kontsert» atty týyndymen qýantpaq. Kórermender erekshe formattaǵy teatrlandyrylǵan shoýdy tamashalaı alady. Hor-kontserttiń baǵdarlamasyna jańa óńdeýdegi halyq ánderi, álemdik hıtter men mıýzıkl arııalary, retro-kompozıtsııalar, belgili zamanaýı ánder engen.

Saǵat 12:00-de Qazaqkontsert ártisteri Qajymuqan Muńaıtpasov atyndaǵy respýblıkalyq mamandandyrylǵan mektep-ınternatta kontsert ótkizedi. Іs-sharanyń maqsaty – balalarǵa jáne jasóspirimderge kórisý dástúriniń mán-maǵynasyn túsindirý, ulttyq qundylyqtardy nasıhattaý. Ártister arnaıy daıyndalǵan kontserttik baǵdarlamany usynady. Sahnada Jeńis Seıdýllauly, Kurmash Mahan, Gúlsim Myrzabekova, Rýhııa Baıdúkenova, Nurbolat Arzamasuly, Saltanat Meńdiǵalıeva, Erbol Tajıbaev jáne Dıdar Abdýhalyq óner kórsetedi.