Kórisý kúni: «Qazaqkontsert» qaıyrymdylyq jobasyn ótkizedi

NUR-SULTAN. QazAqparat – 14 naýryz – Kórisý kúnine oraı «Qazaqkontsert» memlekettik kontserttik uıymy «Kelkóriseıik» qaıyrymdylyq jobasyn ótkizedi, dep habarlaıdy QazAqparat tilshisi.

Іs-shara sanıtarlyq normalardyń tolyq saqtalýymen «Qazaqstan» ortalyq kontsert zalynda 14 naýryz kúni saǵat 11:00-de bastalady. «#Kelkóriseıik» qaıyrymdylyq jobasynyń áleýmettik mańyzy zor. Joba áleýmettik turǵydan osal jandar men az qamtylǵan kópbalaly otbasylarǵa qoldaý kórsetýge baǵyttalǵan. Joba aıasyndaǵy is-sharalar keshenin tamashalaýǵa áleýmettik turǵydan osal otbasylardan shyqqan 100 búldirshin shaqyrylǵan.

Bul merekeni balalardyń kóz qýanyshyna aınaldyrý maqsatynda búldirshinderge ulttyq taǵamdardan turatyn tátti syılyqtar jınaǵy (jent, qurt, irimshik) tabystalady. Sondaı-aq merekelik kontsert ótip, «Astana sazy» memlekettik folklorlyq ansambli men «Halyq qazynasy» bóliminiń ártisteri, tanymal estrada juldyzdary óner kórsetedi. Munan bólek, «Naýryzbektiń oqıǵasy» ınteraktıvtik ertegisi kórsetiledi. Erteginiń sıýjetinde qazaq ertegileriniń, tanymal mýltfılmder men komıksterdiń keıipkerleri toǵysyp, qyzyqty oqıǵalarǵa tap bolady. Zamanaýı formattaǵy qoıylym jas búldirshinderdiń ulttyq qundylyqtar men folklorlyq muraǵa qyzyǵýshylyǵyn arttyrýǵa baǵyttalǵan. Qoıylymdy «Astana mıýzıkl» teatry usynady.

Іs-sharaǵa kelgen balalar men qonaqtar úshin «Qazaqstan» ortalyq kontsert zalynyń foıesinde jabdyqtalǵan kıiz úılerde naýryz kóje usynylady. Sonymen qatar kelýshiler «Qazaqfılm» AQ usynǵan «Muzbalaq» jáne «Kúltegin» mýltfılmderin tamashalaı alady.