Kórgenimnen shoshyp, qımyldaı almadym: Nuraı Serikbaı isinde kýáger qaıǵyly sátti baıandady

Qylmystyq is sotta onlaın-translıatsııasyz, qazaq tilinde ashyq tártippen qaralyp jatyr. Protseske sýdıa Sammıdın Temiralıev tóraǵalyq etti. Búgingi sot otyrysyna prokýror Madııar Ábilqasymov, marqumnyń ákesi Baýyrjan Saǵynbek, onyń eki advokaty, 28 jastaǵy sottalýshy Sherhan Aımahan, onyń eki qorǵaýshysy jáne jýrnalıster qatysty. Aıyptalýshy alqabıler sotynan bas tartqan. Aımahandy foto jáne vıdeoǵa túsirýge tyıym salynǵan.

Alǵash bolyp kýáger Indıra Berkinbaeva jaýap berdi. Sottalýshydan qaýiptenetinin aıtqan ol sýdıadan Aımahandy ýaqytsha sot zalynan shyǵarýdy surady.

Kýáger 11 qańtar kúni keshkisin bolǵan oqıǵany egjeı-tegjeıli baıandady. Onyń aıtýynsha, kóshede kómek suraǵan aıqaı estilgen. Áýeli bir er adam ótip ketken. Birer sekýndtan keıin kýáger keri burylyp, jerge qulaǵan qyzǵa qaraı barǵan.

– Men ony toqtatýǵa tyrystym, bar daýysymmen aıqaıladym. «Ne istep jatyrsyń?! Kómek kerek, polıtsııa shaqyramyn!» dedim. Alǵa qaraı qadam jasadym, biraq ol qaıtadan qyzǵa umtyldy. Qarasam, qyz eki kóliktiń arasyndaǵy tar jerde dármensiz jatyr. Ol kúrtesiniń qaltasynan pyshaq alyp, taǵy eki-úsh ret soqqy jasady. Bolǵan jaǵdaıdy kórgende qatty qorqyp, abdyrap qaldym. Shok saldarynan qol-aıaǵymdy qozǵalta almadym, – dedi Indıra Berkinbaeva.

Onyń aıtýynsha, oqıǵa eki mınýtqa jýyq ýaqytqa sozylǵan. Kýáger shabýyl kezinde qoldanylǵan pyshaqty kórgenin aıtyp, onyń uzyndyǵy shamamen 15 santımetr bolǵanyn jetkizdi. Ol sot zalynda pyshaq kólemin búktelgen qaǵaz arqyly kórsetti.

Shabýyl jasaǵan adam ózine de zııan keltirýi múmkin ekenin túsingen Indıra Berkinbaeva kómek shaqyrý úshin úıine qaraı júgirgen.

Kýágerdiń jaýabynan keıin sottalýshy Sherhan Aımahan qaıtadan zalǵa ákelindi. Sot marqumnyń aǵalary Dinmuhammed pen Sultan Serikbaıdyń kórsetilimderin tyńdaýdy jalǵastyrdy.

Kazinform tilshileri sot protsesin baqylap otyr.

Eske sala keteıik, alǵashqy sot otyrysynda Sherhan Aımahan qasaqana adam óltirdi degen aıypty moıyndamaǵan bolatyn. Ol qaıǵyly oqıǵa bolǵan kúni Nuraımen qarym-qatynasyn toqtatý jáne saqınasyn qaıtaryp alý úshin barǵanyn aıtqan. Onyń sózinshe, kezdesýge deıin kóliginen eki pyshaq – ańshylyq jáne jınalmaly pyshaq alyp, kúrtesiniń qaltasyna salǵan.

Aıyptalýshy janjal kezinde qyz birinshi bolyp ish tusyna pyshaq jaraqatyn salǵanyn málimdedi. Odan keıingi oqıǵalardy basynan ótken kúızelis pen jeti jyl burynǵy bas jaraqaty saldarynan bolǵan psıhıkalyq jaǵdaıyna baılanysty esine túsire almaıtynyn aıtqan.

Alaıda keshendi sot-psıhologııalyq-psıhıatrııalyq saraptama qorytyndysy boıynsha sottalýshy esi durys dep tanylǵan. 

Sot otyrysynyń ekinshi jartysynda marqumnyń ata-anasy men jaqyn qurbysy Nuraı týraly kýálik berdi. Olar qyzdy májbúrli túrde alyp ketý, keıingi ańdý áreketteri, polıtsııa men prokýratýraǵa júginýi týraly aıtyp berdi. 

Aıyptaý tarapynyń nusqasy boıynsha, 11 qańtar kúni keshke Sherhan Aımahan aldyn ala pyshaq alyp, qyzdy úıiniń mańynda kútken. Nuraıǵa 35 pyshaq jaraqaty salynǵan. Onyń ishinde 9 jaraqaty ishki aǵzalarǵa ótken, saldarynan ol oqıǵa ornynda kóz jumǵan. 

Sottalýshy nekege turýǵa májbúrleý, ańdý (stalkıng) jáne asa qatygezdikpen jasalǵan adam óltirý baptary boıynsha aıyptalyp otyr. Sherhan Aımahanǵa 15 jyldan bastap ómir boıyna bas bostandyǵynan aıyrýǵa deıingi jaza taǵaıyndalýy múmkin.