Kórgenimnen "kózaqy" almasam da, estigenimnen "sózaqy" alamyn - Ǵalııa Qaıdaýylqyzy
ALMATY. 22 shilde. QazAqparat /Erlik Erjanuly/ - Oqyrman kitap oqymaıyn dep júrgen joq, oqıtyn kitap tappaı júr. Bul pikirdi "Altyn arqaý" mádenı-etnografııalyq qoǵamdyq birlestiginiń tóraıymy, QR Bilim berý isiniń úzdigi Ǵalııa Qaıdaýylqyzy búgin Almatyda "1001 túıin" dep atalatyn jańa kitabyn tanystyrý rásiminde aıtty.
"Mamandyǵym - jýrnalıst. Sondyqtan sóz saptamaýǵa, sóz jınamaýǵa sózdiń qadirin túsinip, ony halyqqa usynbaýǵa bizdiń haqymyz joq. Kórgenimnen "kózaqy" almasam da, estigenimnen "sózaqy" alamyn", - deıdi jýrnalıst, etnograf, aqyn Ǵalııa Qaıdaýylqyzy. Ol 1951 jyly 1 maýsymda Almaty oblysy Narynqol aýdany Qaınar aýylynda dúnıege kelgen bolatyn. Orta mektepti bitirgennen keıin 1968-1971 jyldary Kegen aýdandyq radıohabarlar taratý komıtetinde júrgizýshi-dıktor, jergilikti halyq teatrynyń negizin qalasqan ónerpaz qatarynda qalamgerlik jolyn bastady. 1971-76 jyldary S. Kırov atyndaǵy Qazaq memlekettik ýnıversıtettiń jýrnalıstıka fakýltetin támamdap, respýblıkalyq tele-radıo komıtetinde kásibı sheberligin shyńdap, maman retinde jurtqa tanyldy. 1985 jyldan bastap mektepten tys tárbıe jumystaryna belsene atsalysyp, respýblıkalyq deńgeıde ótkiziletin kópshilik-mádenı sharalardyń stsenarısi, ári qoıýshy rejısseri boldy. 1990-2001 jyldary Qazaqstan musylman áıelderi qoǵamdyq birlestiginiń negizin qalaýǵa atsalysyp, onyń kóshbasshylarynyń qataryna endi. Sońǵy jyldary "Altyn qazyq" jýrnalynyń Bas redaktory bolyp, "Altyn arqaý" mádenı-etnografııalyq qoǵamdyq birlestigine tóraǵalyq etýde.
