Qorǵaýshylardyń biriniń qaıtys bolýynan Toqtar Tóleshovtiń soty keıinge qaldyryldy
ShYMKENT. QazAqparat - Shymkentte «syra koroli» Toqtar Tóleshov pen ózge de segiz aıyptalýshyǵa qatysty ótip jatqan sot otyrysy qyrkúıek aıyna qaldyryldy. Atyshýly sot protsesiniń keıinge shegerilýine qorǵaýshylardyń biriniń kenetten qaıtys bolýy sebep bolǵan, dep habarlaıdy «QazAqparat» HAA tilshisi.
Belgili bolǵandaı, Tóleshovpen birge aıyptalyp jatqan Eńbekshi aýdany boıynsha Salyq basqarmasynyń bas mamany Madııar Musaevtyń qorǵaýshysy Asan Berdibekovty ara shaǵyp alǵan. Aradan allergııasy bar zańger artynsha qaıtys bolǵan. Osyǵan oraı, burynǵy memlekettik qyzmetkerdi qorǵaýǵa ózge advokat shaqyryldy. Alaıda birneshe tomnan turatyn isten habarsyz qorǵaýshy sýdıadan tanysý úshin belgili bir ýaqyt surady. Bul suranysty sýdıa qanaǵattandyryp, kezekti sot otyrysy 4 qyrkúıekke belgilendi.
Eske salaıyq, buǵan deıin elde memlekettik tóńkeris jasamaq boldy dep aıyptalyp, 21 jylǵa sottalǵan Tóleshovke, endi uıymdasqan qylmystyq top qurý arqyly ekonomıkalyq qylmystar jasaǵan, tabysyn jasyrýmen qatar salyqtan jaltarǵan degen aıyptar taǵylyp otyr. Ári osy áreketteri arqyly memleketke mıllıardtaǵan shyǵyn keltirgeni tergeý kezinde dáleldengen. Іs boıynsha taǵy segiz adam aıyptalýda. Olardyń arasynda Tóleshovtyń sybaılastary men Eńbekshi aýdandyq Salyq basqarmasynyń burynǵy qyzmetkerleri bar.
