«Qorǵaý» JZQ-nyń zeınetaqy aktıvteri «Ular Úmit» JZQ-nyń basqarýyna ótedi
ALMATY. Maýsymnyń 22-si. QazAqparat /Erbol Turymbetov/ - «Ular Úmit» JZQ» AQ-ynda «Qorǵaý» JZQ» AQ-nyń aktıvterin qabyldaýdyń tehnıkalyq jumystary júrip jatyr. Ony qor basshylary búgin Almatyda ótken baspasóz máslıhatynda aıtty,
dep habarlaıdy QazAqparat.
«Qorǵaý» qorynyń 97 myń adamdy quraıtyn salymshylarynyń múddesin «Ular Úmit» qory óz esebinen qanaǵattandyratyn bolady. Al qordyń qurylymdyq júıesine úlken ózgerister engizilmeıdi», deıdi «Ular Úmit» AQ» Basqarma tóraıymy Gúlnár Álimǵazıeva. Onyń aıtýynsha, qordyń qarjy quraldarynyń yqtımaldy qubylmalyǵyn ıgerýge múmkindigi bar. Sonymen birge, orta merzimdi bolashaq salymshylarǵa laıyqty tabysty qamtamasyz etýde jetkilikti áleýetke ıe. «Ular Úmit» qory óziniń enshisine «Qorǵaý» zeınetaqy aktıvterin qabyldaýmen qatar, qosymsha jaýapkershilikterdi de alyp otyr. Olar máselen, nomınaldy tabys kórsetkishi men nomınaldy tabystyń talap etilgen máni arasyndaǵy aıyrmaǵa ótemaqy tóleý mindetin oryndaýǵa daıyn.
Jalpy «Ular Úmit» qorynyń zeınetaqy aktıvteriniń kólemi maýsymnyń 1-indegi derekterge qaraǵanda 280 mıllıard teńgeden asyp otyr. Al ınvestıtsııalyq tabysy 86 mıllıard 117 mıllıon teńgeden asty. Oǵan 1 mıllıonnan astam qazaqstandyqtar óz jınaqtaryn senip tapsyryp otyr.
