«Qorǵaý» qosymshasy polıtseıge qaýipti júrgizýshi taıanǵany týraly dabyl beredi

ASTANA. QazAqparat – «Qorǵaý» qosymshasynyń arqasynda kólik júrgizý quqyǵynan aırylǵan 2 285 júrgizýshi ustaldy. Bul týraly QR Іshki ister mınıstrligi baspasóz qyzmetiniń ókili Shuǵyla Turlybek aıtty, dep habarlaıdy QazAqparat tilshisi.

«Іshki ister mınıstrligi ázirlegen «Qorǵaý» qosymshasy polıtseıge jol erejesin buzýshyny anyqtaýǵa múmkindik beredi. Baǵdarlama kóshe kameralarynyń derekterin taldaı otyryp, jaqyn mańdaǵy polıtseıdiń planshetine qaýipti júrgizýshiniń oǵan jaqyndaǵany týraly dabyl beredi. Ol jol qozǵalysy erejesin qasaqana buzýshy nemese mashınany joǵary jyldamdyqpen basqaratyn júrgizýshi bolýy múmkin», - dedi Shuǵyla Turlybek vedomstvonyń baspasóz alańynda ótken brıfıngide.

Onyń atap ótýinshe, qazir mundaı joba Astana, Almaty, Shymkent, Óskemen, Atyraý jáne Túrkistan qalalarynda júzege asyrylyp jatyr.

«Atalǵan óńirlerde 1 myńnan astam avtokólik aıyp turaǵyna qamaldy, 13,5 myń júrgizýshiniń avtokólikteriniń nómirlik belgileri tárkilendi. Jalǵan memlekettik nómirlerdi paıdalanýdyń 726 faktisi anyqtaldy. Basqarý quqyǵy joq nemese buryn osyndaı quqyqtan aıyrylǵan 2 285 júrgizýshi ustaldy», - dedi ol.