Qorǵastan Batýmıge deıin: Orta dáliz boıymen jańa velomarafon ótedi
ASTANA. KAZINFORM — 21 qyrkúıekte Qorǵas qalasynda «Khorgos — Batumi 2026» halyqaralyq velomarafony bastalady. 50 kúnge josparlanǵan ekspedıtsııada grýzııalyq velosaıahatshy segiz eldiń aýmaǵy arqyly 5,5 myń shaqyrymnan astam jol júrip, Qytaı men Eýropany baılanystyratyn Orta dáliz baǵytyn basyp ótedi.
Qazaqstan marshrýttyń alǵashqy eli ári negizgi kezeńderiniń biri bolady. Veloshabandoz elimizdiń aýmaǵynda shamamen 1,7 myń shaqyrym joldy júrip ótedi. Qorǵastan bastalǵan baǵyt Shelek pen Almaty arqyly ótip, odan ári Qordaı, Merki, Taraz jáne Shymkentke ulasady.
Jobanyń uıymdastyrýshysy ári negizgi qatysýshysy — grýzııalyq velosaıahatshy Nodar Berıdze. Ol on jyldan astam ýaqyt boıy velosıpedpen álem elderin aralap keledi. Osy ýaqyt aralyǵynda N. Berıdze shamamen 70 myń shaqyrym jol júrip, 28 elde bolǵan.
Ekspedıtsııanyń alǵashqy kezeńi 21 qyrkúıekke josparlanǵan. Veloshabandoz Qorǵastan Shelekke deıin shamamen 200 shaqyrymdy eńseredi. Kelesi kúni Shelekten Almatyǵa taǵy 130 shaqyrymdaı jol júredi. 23-24 qyrkúıekte Almatyda birqatar is-shara ótkizý josparlanǵan. Al 25 qyrkúıekte marshrýt Qordaı baǵytymen jalǵasady.
Keıinirek velosaıahatshy Qazaqstanǵa 21 qazanda Qaraqalpaqstan tarapynan qaıta kiredi. Bul joly baǵyt Beıneý, Saı-Ótes, Shetpe, Quryq jáne Aqtaý arqyly ótedi.
Osylaısha, Qazaqstan halyqaralyq marshrýttyń bastaý núktesi ǵana emes, Ortalyq Azııany, Kaspıı óńirin jáne Kavkazdy baılanystyratyn baǵyttyń negizgi bólikteriniń birine aınalady.
Velomarafon Qytaıdy, Ortalyq Azııa elderin, Kaspıı óńirin, Kavkaz ben Eýropany baılanystyratyn Transkaspıı halyqaralyq kólik marshrýty, ıaǵnı Orta dáliz boıymen ótedi.
— Ekspedıtsııanyń maqsaty — Orta dálizdiń kólik jáne ekonomıkalyq mańyzyn ǵana emes, óńir elderi arasyndaǵy baılanystardy damytýdaǵy rólin de kórsetý, — deıdi Nodar Berıdze.
Jalpy, ekspedıtsııa 50 kúnge sozylyp, 10 qarashada Batýmı qalasynda aıaqtalady. Qazaqstan, Qyrǵyzstan, Ózbekstan jáne Tájikstan aýmaǵyn basyp ótkennen keıin marshrýt qaıtadan Qazaqstanǵa kirip, odan ári Ázerbaıjan men Grýzııa arqyly jalǵasady.
Buǵan deıin Úrimshiden Astanaǵa deıin velosıpedpen júrip ótken Búrlen Ádiletqyzy týraly jazǵan edik. Bıyl Búrlen Qazaqstannyń túkpir-túkpirin aralap, uzaq velosaparyn elordada aıaqtady.
