Qorǵastaǵy kisi ólimi: Prokýror aıyptalýshyny 9 jylǵa bas bostandyǵynan aıyrýdy surady
TALDYQORǴAN. QazAqparat - Taldyqorǵanda Qorǵastaǵy adam ólimine baılanysty sot otyrysy jalǵasýda. Prokýror sýdıadan aıyptalýshy Dıas Káripjanovty 9 jylǵa bas bostandyǵynan aıyrýdy surady, dep habarlaıdy QazAqparat tilshisi.
Prokýrordyń sot zalynda aıtqan málimetine sáıkes, aıyptalýshy Káripjanov pen marqum bolǵan Tólegenovtyń arasynda buǵan deıin birneshe márte kıkiljińniń bolǵanyn rastady. Al jábirlenýshi taraptyń qorǵaýshysy bul óte jeńil jaza dep sanaıdy. Sondyqtan sottan sottalýshyǵa qatań jaza berýdi talap etti. Sonymen qatar, Káribjanov marqumnyń týystaryna 2 591 200 teńge materıaldyq shyǵyn men 2 mıllıon teńge moraldyq shyǵyn ótep berýge mindetteldi.
Esterińizge sala keteıik, sot protsessi 22 tamyzda bastaldy. Alaıda aıyptalýshy oryndyǵynda otyrǵan Dıas Káripjanov taǵylǵan aıyppen kelispeıtinin jetkizdi. Onyń sózinshe, ol Qýanysh Tólegenovty qasaqana óltirmegen jáne ol istegen áreketine qatty ókinetinin, qylmysyn jartylaı moıyndaıtyndyǵyn jetkizdi. 22 jastaǵy kúdikti QR QK 99-baby ıaǵnı, «Qasaqana adam óltirý» faktisi boıynsha aıyptalýda.
Aıta ketý keteıik, bul oqıǵa bıyl 4 maýsymda «Qorǵas» shekara mańy yntymaqtastyq halyqaralyq ortalyǵynyń aýmaǵynda boldy. Panfılov aýdanynyń turǵyny D. Káripjanov óziniń tanysy Q. Tólegenovpen ózara sózge kelispeı, onyń keýde tusyna pyshaq suǵyp alǵan. 25 jastaǵy azamat alǵan jaraqatynan keıin Jarkenttegi aýrýhanaǵa jetpesten kóz jumdy. Adam óltirý oqıǵasy beınebaqylaý kamerasyna túsip qalǵan bolatyn.
